Ons kinderhuis in Bloemfontein, is ‘n plek wat baie baie na aan my hart lê.  November 2007 het ek en my man besluit om ‘n kind in te neem van Ons Kinderhuis vir die Desember vakansie.  Min het ons geweet dat die besluit ons lewens vir altyd sou verander.  Ons is deur die hele keurings proses en toe word ek voorgestel aan die mees wonderlikste  klein mensie; Carlene.  Carlene het ons huis en ons harte binne geval en ek dink ons het onmiddelik geweet dat sy gaan vir die res van ons lewens deel wees van ons.  Ons het onmiddelik begin met beplanning en reëlings om haar in pleegsorg te kry.  Die hele proses was lank en uitgerek maar in die Here se hande.

In Maart 2007 was die pleegsorg goedgekeur en kon ek vir Carlene finaal by Ons Kinderhuis gaan haal en sak en pak HUIS TOE BRING.

Sederdien besoek ek gereeld nog die Ons Kinderhuis en het ek van die kinders beter leer ken, en ja ook die tragiese geskiedenisse wat daarmee saamgaan. Met soveel hartseer en behoeftes van onskuldige kinders in een plek versamel is een groot lig punt, wonderlike toegewyde personeel wat daagliks alles in hulle vermoë doen om vir al die kinders (tans ±100) liefde en aanvaarding en ‘n veilige tuiste  te gee.  Hierdie mense doen ongelooflike werk, met absoluut die minimum fondse en dus ook personeel tekort.

Ek was vandag saam met die hoof Frikkie van Dyk in hulle saal wat hulle gebruik vir opvoerings ens, en daar is soveel werk.  Die mure is gebars, die vloer moet oorgedoen word asook ‘n waterlek in die dak van die verhoog, wat die vloer van die verhoog lig.  Dis alles goed wat aandag kort maar daar is net nie fondse beskikbaar nie.

Ek hoop en bid dat die mense van Onsdorp hul weg gaan oopsien om te help!

Liefdegroete,

Eloise