Daleen vertel self:

Was jy al ooit op Ladismith? Dis die mooiste plekkie om te woon. Ek ruil dit vir geen ander plek op aarde nie. Ek is in 2000 gediagnoseer met 4 breingewase en sou volgens die neurochirurg OF baie aggressief OF baie kunstig raak in die nabye toekoms. Ek het sommer dadelik die aggressie gekanselleer en die KUNS met beide hande aangegryp. Sedert my eerste van drie kunslesse (op 19 Oktober 2000) het ek al 169 skilderye (oliverf op canvas) verkoop.  Ek skilder so ongeveer (snags wanneer die gewone mense slaap) 4 skilderye per maand. Werk bedags by Eskom op Ladismith, en doen nog al my huiswerk ook self.

Dit was so wonderlik om te sien hoe goed onder my hande lewe kry. Diere, portrette, landskappe, kosmos, als wat ek nog probeer het, was 'n sukses, en ek besef watter groot genadegawe dit is.

Ekself sou so iets nooit kon doen, dit moet 'n Hoer Hand wees. Soms staan ek so terug en vertel Hom dat Hy darem maar weer 'n mooi kunswerk geproduseer het. LOUTER GENADE dis wat dit is.

Ek glo ek gaan Ladismith nog op die LANDKAART plaas.

Liefde. Van Daleen.