Agtergrond

...'n ietsie meer OOR DIE WEBWERF EIENAAR, EN SY KAMERMAATJIE...

So n bietjie agtergrond. Die volgende stukkie was in een van my heel eerste nuusbriewe:My werf se hek le oop en as jy n ledige oomblik het, loer gerus hier rond waar jy die luim grond sal sien wat ek en jy nog gaan omploeg.

Ek is n 6'4" Kapenaar, klipdokter, met n blyplek in Sandton waarin ek nog skaars gewoon het , want ek werk wereldwyd en het al die ou planeetjie so te se behoorlik stof getrap.
Was al bo in die Andes gebergtes van Peru waar die suurstof dun raak en diep in die myne van Wes Transvaal waar die klip die hand brand en die donker tasbaar is.
Annabelle en ek het al oor die Suidpool gevlieg en Oerang-oetangs gesien langs Meer Toba in Sumatra.
Geduik in die helder water van Bunaken en afgestap in n rokende vulkaan op Sulawezi. Spaans geleer in Chili, en rissies leer eet in Thailand.

Kwaai gesweet vir 2 jaar op n treinspoorprojek in Taiwan en toe eers weer terug SA toe vir uitvars en moedskep.

In die Kalahari – Upington - gebore en daar tande gekry. Nog nooit groot geword nie, net vet. Was kranige 100 en 400m atleet in die WP maar moes teen beter manne soos Danie Malan en Dicky Broberg 4de kom in die proewe. Op Clifton geboer. Het vir Cape Town City onder 18 sokker gespeel asook 1ste span o19 rugby vir Jan Van Riebeeck (Saterdae was dus redelik besig met rugby in die oggend en sokker in die middag) Tafelberg verskeie kere uitgestap , ook die Otter en die Blyde gedoen. Vanaf Lesotho 65km tot in Natal gestap a la voortrekker, oor die Drakensberg.Was lief vir muurbal toe ek nog kniee gehad het. Speel graag skaak, brug en poker en daai volgorde. Diamante gesoek vir De Beers in Namakwaland, Stellenbosch toe waar ek Geologie en n selfs paar maande onder Hennie Aucamp HOD geswot het. Met kamermaatjie Annabelle getroud, goudmyne toe (Stilfontein/Klerksdorp) en het verskeie proefbuisbabas probeer. Tafelronde het n baie groot rol in ons lewens gespeel. Mense mense van ons gemaak.

27 plus jaar later is ons nog knus getroud en bederf steeds sowat 8 peetkinders om die beurt

Ses jaar lank op die Lesotho waterskema gekuier as klipdokter in die 65km lang tonnels. Daarna na Hong Kong, die Philipyne, Sumatra, Suid Amerika (Chile - Peru - Argentinie en Brasilie)

Toe weer Taiwan toe om vir 2 jaar op hulle sneltreinprojek te werk.

Vanaf einde 2004 tot 2006 werk ek op die eiland Sulawesi in Indonesie op n Hidrodambouprojek vir n Kanadese Maatskappy. Die Eiland le noord van Australie en strek van noord na suid oor die ewenaar. Daar is baie raakpunte tussen die eiland en die Kaap. Baie slawe is hier gevang. Daar is n fort wat net soos die kasteel lyk in n dorpie met die naam Makkassar...

Daarna na Suid Korea op nog n sneltreinprojek.

Intussen het ons MARINAS, n gastehuis in Richmond in die Karoo aangeskaf. Wilna ,my suster, en haar man Johan bestuur dit vir ons. Klop gerus aan, daars afslag vir Kammalanders!

Na twee jaar op die Gautrein projek in Johannesburg, vertrek ons Middel Ooste toe en wel na Doha in Katar. Uiteindelik lei die paadjie weer 'huis' toe.

Maar wie weet wanneer die geit vir gatskuur weer gaan toeslaan....