....Só MAAK MENS !

Begin tot Aug '09

AUGUSTUS


1

 Portugese Lemoen Rolkoek

4

Limonade en vrugtesappe

5

Mieliebrood

13

Bierblik Hoender

16

Hoender en Lensies, en spinasie gebak

24

Alles oor son oonde, prut potte en resepte daarvoor!

 

Moeder se regte kerrie!

 

Moeder se Koeksisters

28

Skuinskoek

 

Vetkoek , vetkoek, vetkoek

JULIE

Soetpatat wafels

Die begin dae...

 

 

Bethulie se dorpswapen

 

Rooibostee met sitrus

11

Soppe, pampoen, spinasie en brokkoli

13

Avo-disse

15

Persimons

18

Kombuis toestelle

20

Alles oor pannekoek, wafels en plaatkoekies

 

Bruinrys nagereg en ander diabetiese resepte

 

My sagte wonderlike altyd reg pasteitjies!

 

Melkkos en snysels

 

Kluitjies en kliet’jes en heerlike Gemmer-kastrol-nagereg!

 

Konfyt tertjies

 

Termiete en rysmiere

 

Kampkos: varktjops, steaksous en askoek

 

Algemene huishoudelike wenke...

 

Prutpot en stadige geregte

 

Moeder se Kerrie en rys

 

Ryspoeding

 

Epilepsie week: Wenke en raad en algemene inligting

 

Psoriase

22

Diabetiese Klapper en appel en dadel nageregte

25

Wafel-snackle-doppies...

 

Rugprobleme

29

Sago en Meringue poeding

 

Nael sorg

 

Wafelsouse

 

Preie en prei-resepte

 27 Augustus

Dagsê lesers!

Terwyl die Appelkoos-, perske-, amandel- en pruimbome  toegetree het tot

die wedywering van ‘n lentebloeisel kleurespel, gooi die Wilgers op die damwal

hul eie stuiwer in die beurs, en begin die lang latte vol lentegroen blare heen en

weer oor die water swiep.

Gansneste vol eiers word hissend bewaak, en voluierooie lam tussen Denne wat

saggies in die lang laning in die wind huil.

 

Agt dooie lammers  vertel die tweesnydende swaard se ander verhaal terwyl

gesonde drielinge en tweelinge kwispelstertjies aan hul ma's drink.

 

Hennie Coetzee skryf: Daar moet letterlik honderdduisende flieks wees wat mens

nooit weer te sien kry nie.Is daar 'n betroubare webwerf waar jy ou flieks in veiligheid

op jou persoonlike rekenaar kan aflaai?

 

Hennie, ek vra hierdie vraag sommer in die openbaar want ek weet  regtig self nog nie

waar  jy dit met veiligheid kan doen nie, ek is seker daar sal wel iemand iets weet!

Ek weet net as jy op Google intik : "Download old movies" en "Download DVD movies"

dan gaan daar heelparty webwerwe oop waarheen die een jou na die ander een rondwys,

maar heel party is ietwat obskuur so ek het nie te diep gedelf nie! Maar daar is ook ‘n paar

wettige werwe, so gaan loer gerus. Ek het bv. "Download Gone with the wind movie" ook

ingetik en daar was nogal  ‘n paar  oulike werwe waar jy verseker iets sal kan aflaai.

Asseblief Lesers,

as jul ander betroubare werwe gebruik, help my bietjie hier!

 

Trudie sê:Hi, Ek hou baie van die Afrikaanse forum. Ek wil net bietjie gesels.

Ek kyk graag na die resepte want ek is mal oor bak en brou.

Dankie Trudie,

dit is altyd heerlik  om terugvoer te kry en ek hoop jy kan met welslae

van my resepte bak, brou en geniet!

 

Kyk hoe baie ure

van baie dae het jy wat

jy moet wegbêre.(Alba Bouwer)

                                                                                                                                                                                                                                                            

26 Augustus

Dagsê Lesers

Ons eerste perskebome en amandelbome staan pienk en wit in die blom!!

Die Aalwyne het begin oopmaak  en persblou  Felicia's en helder pienk

Voëltjie-kannie-sit-nie vygies, blom  baldadig orals langs my stappad.

Die dae is heerlik mildadig as die wind nie waai nie en die ganse het begin broei.

Die eerste bokooi het ‘n prag miniatuur tweeling ooitjies gelam, maar skielike koue

het die een bruinetjie laat verkluim!

Die ander enetjie slaap nou saans onder ‘n rooi lig  en ek glo sy sal groot word.

Die ander ooie staan voluier en wag en ek dink  skaars 2 weke van nou af begin almal lam!

 

En ek leef my dag met dankbaarheid....

Vra ‘n Leser : Kan mens regtig groente in gebak gebruik, of is dit net ‘n ma se

truuk dat hul kinders ekstra groente moet eet?

Wel  liewe vriend ,

Natuurlik! Beide is waar! Probeer sommer dadelik :

 

SOETPATATWAFELS.

Kook 1 groot soetpatat en dreineer.

Druk gaar patat deur sif of versapper om 250 ml patatpuree te kry.

Meng dit met die gele van 3 groot eiers en 250 ml melk.

Meng in ‘n aparte bak : 375 ml koekmeel, 15ml bakpoeier, 15 ml  suiker,

‘n knypie sout en 5 ml kaneel.

Maak ‘n holte in die middel en gooi die melkmengsel daarin.

Roer dit. Klop die wit van die 3 eiers styf.

Vou dit in die mengsel in saam met 45 ml afgekoelde gesmelte botter.

Maak wafels. (Gooi deeg dun in gesmeerde wafelpan en bak oor medium hitte tot

goudbruin en gaar. Keer uit en eet saam met room, heuning of roomys....)

 

En, Kapittel  Hendro my juis :

Jammer Mev Kruger, by die koeksister resep, ek vra nou miskien n dom vraag,

maar jy se net maak gaar in diep olie en druk onder stroop.?

Wanneer? as hy eers koud is? en as hy pas uit die olie kom, hoe hou jy hom

vas? Hoe lank is nie te lank nie? en wat is te kort? As ek hom bv soos n

kurkprop net die stroop indruk en dadelik weer uithaal.... of hou ek elkeen

5 minute in om dit 'natter' te maak?

Jy moet mens darem meer stap vir stap help mens!

 

Beste Hendro,

Nou ja, Goed, net vir die rekord! Laat daar nie gesê word ek antwoord nie navrae nie!!...

Koeksisters word nes vetkoek in diep olie gaargebak, plaas die rou gevormde vetkoek

of koeksister  in die olie, wag tot dit goudbruin is aan die eenkant en dan draai jy dit

liggies met ‘n gaatjies lepel om tot bruin aan die anderkant. Lig dit uit die olie, met die

gaatjies lepel of ‘n braaitang dit werk ook maklik,  laat die ergste olie afdrup, en dan dompel

jy die warm koeksister in die stroop met ‘n groente "masher" (dit werk baie lekker!)

vir so ‘n paar tellings.

Jy sal sien die koeksister kry so ‘n ‘deurskynende' verglansde lagie , dan weet jy dit het

klaar stroop getrek en kan jy dit maar uithaal en die oortollige stroop op ‘n druprakkie wat

binne in ‘n skinkbord staan laat  afdrup .

Voila ! Lekker koeksisters bak!

 

 24 Augustus

Liewe Lesers,

Ek het al ‘n maklike resep vir  koeksisters geplaas, maar hierdie navraag wil ek

nietemin graag beantwoord!

Rochelle vra :Party mense hou van droë koeksisters, ander van baie stroperige

koeksisters, maar waarom trek party nie  genoeg stroop nie?

Die kuns is, dat JY die deeg moet beheer, NIE die deeg die proses nie.

M.a.w. jy besluit watter deeg om te maak, hoeveel stroop jy wil laat intrek of nie,

party deeg slurp behoorlik die stroop op en ander, wel hul trek geen stroop nie.

Ek kan eerlik sê die beste wenk is, dat jy jou deegresep moet reg kies.

Daar is baie rate: Hou jou stroop koud, ‘n tikkie suurlemoen in die sous,

die koeksisters moet bros en goudbruin wees, warm in yskoue stroop gedoop.....

maar volg eerder die volgende raad:

1. MOET NOOIT  enige smeer, olie of margarine of botter in jou deeg sit nie.

 2. Laat jou deeg bietjie rus voor jy dit uitrol.

 3. Moenie te dun uitrol nie sowat 5mm is perfek.

 4. Moenie jou koeksisters te styf vleg nie, maak seker die punte is mooi styf vas.

 5. En jou stroop, sorg dat jou suiker volledig opgelos is voor dit kookpunt bereik.

 

En nou ‘n familie-geheim waarmee ek my erfporsie wegtik...ja, een van daai

 "familie-grafresepte"...  Vergewe my asseblief Moeder...!)

 

RETHA-HIERNA-KERKMUIS-SE KOEKSISTER-RESEP

STROOP:

10 kp suiker

6   kp water.

Roer suiker en water oor lae hitte tot suiker heeltemal opgelos is.Voeg by:

½  tl kremetart

¼  tl wynsteensuur

Kook als sowat 10 min en laat afkoel.

DEEG :

5  kp koekmeel

3  tl bakpoeier

1½  etl  suiker

¼  tl sout

 2 eiers

 ¾  kp water

 Klits die eiers en water goed saam.

 Klits die suiker by.

 Meng  res van bestandele by.

 Laat deeg vir sowat halfuur rus.

 Rol sowat 5mm dik uit, moenie die deeg rek en trek nie, sny 3 beentjies en vleg

lossies  of sny net 2 beentjies en draai liggies, maak seker die punte is goed vas.

Bak in diep olie tot goudbruin.

Druk die gaar koeksisters goed onder die stroop, haal uit en laat afdrup.

Vir ‘n "droër" koeksister,  moenie lank in die stroop onderdompel nie.  Voila!

 

 Gee meer

en jy sal meer ontvang.

Kla minder

en daar's lag en sang!

 

21 Augustus

Dagsê Lesers

 

 Vra iemand my nou die dag: Hoe maak jy ‘n lekker warm Kerrie? !

Wel, seg ek, dis nou maklik ek sal jou die resep gee!

Dis nou een gereg wat ek geniet om te maak! En toe kom ek met die tikkery hiervan agter,

Mapstieks! Ek kan nogals nostalgies liries hieroor raak!

Met die kom sit  en wil begin tik, kom ek toe mos agter dat mens nie altyd ‘n resep het

vir wat jy altyd doen nie!So, om ‘n lekker Kerrie te maak, is die beste wat ek nou kan doen,

om stap-vir-stap te sê :

SO MAAK MENS!

 

Die belangrikste ding om te onthou as jy ‘n lekker Kerrie wil maak is om GEEN

water te gebruik nie.

Gebruik ook ‘n diep dikboompot, dat jy lekker daarin kan roer sonder om als uit te laat spat.

Ek gebruik NOOIT net die gekoopte boksies Kerrie poeier nie, as ek nie  ‘n geurige  vars

kerriepoeier mengsel op die  Indiese mark kan koop nie maak ek my eie deur  geel,

bruin-oranje en rooi kerriepoeier  te meng. Jou Kerriepoeier moet  neig na die kleur van

fyn vars paprika, en dit moet  in die fles al lekker ruik. Maak jou oë toe as jy ruik,

dit moenie na ‘kerrie" ruik nie dit moet na ‘n aromatiese mengsel van geurige kerries ruik.

Moenie te groot stukke vleis gebruik nie hou by kleiner  blokkies of  vra vir kleinerig of dun

gesaagde skenkels. Maar nie maalvleis nie asseblief!  Maalvleis Kerrie is vir Boboties of vetkoek!

Ook nie wildsvleis nie, die draderige grein  en smaak werk nie , vertrou my.

Wild is vir wildsvleis geregte, ek sal later resepte daarvoor vir julle gee!

Jagtyd is hoeka  so pas amper genadiglik verby!

Ek hou van 1 kp sultanas of gekapte droë  appels of  rosyne in my Kerrie maar jy

kan dit los as jy wil.

Kerrie is altyd die volgende dag  nog lekkerder!

Moenie kortpad vat en die groente  deurmekaar  of bymekaar gooi en dit dan saam roerbraai nie.

Vertrou my, volg die aanwysings!

As jou Kerrie te warm/sterk is, roer aan die einde net voor opdiening ‘n halwe koppie ongegeurde

yogurt by, of bedien die Kerrie saam met ‘n bakkie fyn klapper, ‘n bakkie ongegeurde yogurt,

en altyd ‘n mooi vars tamatie, pietersielie en uie sambal.

Jy kan ook pappadams daarby voor sit, en as jy dit nie het nie, knoffel en pietersielie bros

broodjies, of Melba roosterbroodjies...

As jy hoender Kerrie maak, kook 1kp bruin  heel lensies saam met jou rys, en gebruik

eerder ‘n Breyani-masala en Kerrie mengsel.

O, nog een ding, om ‘n lekker Kerrie te maak vat tyd. Dis ‘n langdradige proses ja,

maar alle goeie dinge neem tyd.  Geniet dit, sit mooi musiek op, skink ‘n glasie

appeltizer en  KUIER  by jou stoof met jouself!

Dis ‘n liefdesdiens vir die eters later...

 

"RETHA-SE-MA-SE-LEKKER-KERRIE !"

1. In goeie sonneblom olie of olyfolie,  Roerbraai sowat 1 ½ kg  GOEIE nie te vetterige

blokkies vleis of skenkels tot mooi bruin en gaar. Skep uit kastrol en sit eenkant.

2. Roerbraai  blokkies geskilde aartappels tot goudbruin en gaar , nie bros nie, skep uit,

 hou eenkant.

3. Roerbraai sowat 3 groot  gekapte uie , tot goudbruin en deurskynend, hou eenkant.

4. Roerbraai 2 groot blokkies gesnyde eiervrugte of brinjals/aubergines, tot sag, bruin

 en gaar. Skep uit en hou eenkant.

5. Neem sowat 3 groot Etl botter en Roerbraai die botter tot dit "skei " .

(Jul al gehoor van ghee?) Gooi die water deel af.

 Gooi nou   by die "uitgebraaide" botter in die kastrol :

 1 tl tiemie,

 1 tl pietersielie,

  2-3 Etl masala,

 2-3 Etl Kerrie, ( jou keuse, matig of sterk maar gebruik goeie vars Kerrie)

 2 Etl ster anys,

 2 tl komyn sade,

sowat 6-8 vars jong suurlemoenblare,

1 tl aromat,

 2 tl growwe swart peper,

 1 tl chicken spice,  en

1-2 tl rooi peper.

 Roerbraai die  kruie  vir sowat 2 minute tot dit wil wil aanbrand.

6. Gooi nou die vleis by, en meng  GOED deur.

7. Skep dan die eiervrug en uie by, roer LIGGIES deur.

8. Skep dan die aartappels bo - op maar moenie roer nie. Jy wil nie jou blokkies laat

blus of fyn kook nie.

9. Meng nou sowat  ½ kp suurlemoensap, ½ kp tamatiesous of tamatie puree

( ek verkies lg.)  ½  kp appelkoos konfyt,  NOG  2 tl Kerriepoeier en 3 tl Borrie  in ‘n

 bekertjie, en gooi dit  bo oor die Kerrie In die   pot.

10. Stel jou plaat nou stadig dat dit lekker kan stowe. Sowat half uur.

 Roer-lig die bodem van die Kerrie in die pot net so een of  twee maal om, om seker

 te maak dit brand nie aan nie.

 Net voor bediening roer die Kerrie LIGGIES om dat die aartappel blokkies ook deurmeng.

 Voila!!

Geniet dit!

 

Byt meer af as wat jy kan kou,

en kou dit.

Beplan meer as wat jy kan doen,

en doen dit.

Mik jou pyle na die sterre

Vat korrel,

En daar is jy!

-Anoniem-

 

16 Augustus

 Dagsê Lesers!

Ja-nee, Nou skep ek behoorlik moed!

Die eerste Kaalgat-perske bome staan pienk in blom!

Die eerste aalwyn raseme  bot groen, net gereed om oop te vou, en wat is meer

baldadig as die laaste wintersblare wat op die grasperk deur die Augustus wind en ‘n

ewe baldadige gemmerkat rondgejaag word.

 

Eddie skryf: Kan iemand my inlig hoe maak mens 'n "Sonoond" om te kook met

sonkrag ek hou daarvan om te eksperimenteer !!!!

Beste Eddie,

Jammer jy moes so lank wag, maar ek het vir jou 3 idees opgespoor!

 ‘n Hooikis, en 2 son modelle, een vinnige een en een stadige een! 

 As jy vir my ‘n faks nommer kan verskaf kan ek vir jou die hooikis

inligting deurfaks.

Indien nie sal ek dit per epos probeer aanstuur.

Jy kan ook o.a. die sonmodelle gaan bekyk op:

www.sustainable.com

www.treehugger.com

http://planetgreen.discovery.com

Hoop dit kan jou help!

                                                                                                                                                                                                                                                                                                                                                                                            

Die kleure waarmee ek verf,

  kleef aan my hande.

 Daarom is dit beter

 om liewer ander mense vol blydskap te verf!

 

13 Augustus

Dagsê Lesers!

En amper het ons bederf geraak met heerlike somersweer so oor die lang naweek.

Net om weer deur ‘n koue front in die bek geruk te word.

Maar so laat ons ons nie onderkry nie, die halstarrige  Winterweer vra net na

ekstra trooskos, en dit kan ons maklik regkry!

 

 Trudie van Kaapstad skryf:

  Hi Retha + mede-dorpers.  Ek is op soek na 'n lekker, maklike 1 pot gereg met lensies.

 My kossmaak is seker maar aan die soet-kant, maar ek moet dit begin uitsny.

Ek hou van eenpot-geregte oomdat daar minder skottelgoed is en so kan ek items

waarvan ek nie juis hou nie, maar tog moet eet (bv. spinasie, broccoli) verberg.

Enige resepte of ander idees?

 Groete vanuit koelerige Kaapstad.

 

Beste Trudie,

'n ou gunsteling!

HOENDER MET RYS EN LENSIES

15 ml olie                                    

400 g hoenderbors filette in blokkies of repies gesny

 1 stuk pypkaneel                            

3 ml komyn

6 heel naeltjies                             

50 ml botter

 1 - 2 groot uie gekap                     

350 g rys

 125 g lensies                                

125 g rosyntjies/sultanas

 Vars pietersielie                

Sout en growwe swart peper

1 l hoenderaftreksel (2-3 blokkies in 1 l warm water, of 2 pakkies kitssop)

(I.p.v. bg speserye, neem ek soms net sout,

peper,aromat,kerrie,borrie en hoender speserye!)

 Verhit olie en soteer speserye daarin vir sowat 2 minute oor matige hitte.

 Voeg botter en uie by en soteer tot goudbruin en sag.

 Roer hoenderstukkies by en braai tot ligbruin.

 Roer rys by en roerbraai sowat 5 minute.

 Verhoog hitte  en roer warm aftreksel, rosyne en lensies by. Sodra dit kook,

 verlaag hitte en laat prut met deksel op vir sowat 20 minute.

 Geur met res van bestandele net voor opdiening.

 Heerlik net saam met ‘n slaai.

 

En het jy al spinasie en lensies  saam gaargemaak? Soos die kitsklaar bevrore weergawe van IJ?

Ek kook my lensies tot gaar.Dan my spinasie net vinnig op. Maak ‘n lekker kaas witsous,

skep lae opmekaar,kaas en krummels bo-oor en bak dit vinnig in oond soos lasagne!

Hoop jy geniet dit!

 

 Glennys sê :

 Maak dit ‘n reel van die lewe:Om nooit spyt te wees oor iets nie

 En om nooit terug te kyk nie!

Spyt is ‘n ontstellende mors van energie

Jy kan nie daarop bou nie

Slegs daarin rondspartel.                                                    

 

5 Augustus

Dagsê Lesers!

Ja-nee ! Die maand doen sy Naam gestand en blare waai baldadig  in die wind,

teen lyndrade vas en skerm teen mekaar en die stamme van kaalarm Populiere.

Kry ek hierdie "interesante"  reseppie , probeer dit gerus en laat weet  hoe dit was!

BIERBLIK HOENDER MET TIEMIE EN ROOSMARYN

Meng : 1tl sout

1tl paprika

1tl tiemie

1/2 tl suurlemoenpeper

1/2 tl growwe swart peper

2 tl olyf olie

 Vryf hele hoender  eers met olie en  krui dan die hoender goed in met die spesery mengsel.

Maak 1 blikkie bier oop, gooi helfte  daarvan in ‘n glas uit.(Drink dit maar!)

Gooi nou 2 takkies vars roosmaryn, 1 knoffelhuisie gekneus, sap van 1 suurlemoen ,

nog 1tl tiemie en 1/2 tl  growwe rissie in die blikkie.

Maak nog 2 gate bo in blikkie .plaas nou die blikkie op 'n stewige rooster oppervlak,

en laat die hoender  gebalanseer  bo-oor die blikkie "sit".

Rooster die hoender oor medium hitte tot gaar. Haal versigtig van rooster af,

en verwyder die blikkie sodra bietjie afgekoel is. Bedien warm.

Die bier en kruie  stoom trek deur die hele hoender en die geur marineer heerlik van binne af deur!

Voila!!

                                                                                                                                                                                                                                                              

Daar lê ‘n droom

 in my en jou

 eers vlindersag

dan grootoog

 ‘n gedagte

 -Freda-

 

4 Augustus          

Dagsê lesers!

Ek deel sommer vandag ‘n gedig van Patience Strong met julle,

vir die lekker daarvan!

(Vry Vertaal)

 

Die Geheime Tuin.

Praat as jy moet terwyl ek jou die tuin waarvoor ek lief  is wys

Al wandelend langs gesnoeide heinings

waaroor takke boog

Praat oor die weer of wat ook al

Al drentelend  waar mosbegroeide paadjies lei

Maar wanneer ons by die hoek kom

Waar die Wagtersbome waak

- die geheime plek waar dit altyd lente is en geen winterswinde waai -

Praat dan

geen woord daar langs die stil poel waar gefilterde sonlig glim

En trap saggies op die tyd deurleefde stene

Want jy stap

tussen my drome.

 

 En vir ONTBYT  probeer gerus hierdie  i.p.v  Croisants....ons woon immers in Afrika !

MIELIEBROOD

500g Bruismeel 5ml Sout

1 Blik Roommielies 2 Eiers

170g-Blik Ideal Melk 60ml Olie

Metode:

Meng Meelblom, Sout En Mielies Saam. Meng Eiers, Ideal-Melk En Olie

Saam En Roer By Meelblom. Gooi In Gesmeerde 1kg-Broodpan En Bak 50-

60 Minute By 180°C.

Geniet dit!

 

1 Augustus     

Dagsê Lesers!      

Kan julle glo dat die windwaaimaand sowaar al aangebreek het!

En dit lyk my daar is lesers wat ook nie kan wag dat die lente moet aanbreek nie,want

Talitha vra : Hoe maak mens sap ?

Wel Talitha,begin sommer dadelik met die volgende "limonade" reseppie.

Rasper eers die skil af van 36 suurlemoene en druk die sap dan uit.

Gooi skil en sap in houer, gooi 36 kp suiker, 45 ml elk van :

*sitroensuur, *wynsteensuur en *engelse sout 

as ook 4.5 l kookwater by.

Roer totdat suiker opgelos is. Laat oornag staan, syg deur en bottel.

Los van die skilletjies in die stroop dit bly lekker en lyk mooi!

Gebruik soos gewone aanmaak koeldrank.

(Kleiner resep : 415ml sap , 7.5ml elk van * en 500ml water.)

 

Om vrugte of groente sap te maak, het jy 'n paar opsies, en dit kan natuurlik

ingemaak word ook,maar dit is 'n onderwerp op sy eie so ek volstaan met die

 maak van 

VARS VRUGTESAP 

 Was indien nodig, Skil, ontpit en versap bloot jou vrugte, jy kan dit met 'n

 voedsel verwerker of met die hand doen.

Syg die sap en pulp van die vrugte deur 'n sterk doek.

 

Vir SITRUS,maak die vrugte effe warm en druk met lemoen uitdrukker uit.

 Vir vrugte met min sap, bv pynappels, of appels, druk die vrugte fyn,

 verhit stadig en voeg die hoeveelheid water by om 'n sap te vorm.

(300ml water vir elke 500g vrugte)

Verhit die vrugte in 'n emalje kastrol met deksel, bo-op 'n ander kastrol met water

sodat die vrugte hul geur beter kan behou. Syg deur en verkoel.

Gebruik netso of verdun met swart onversoete   rooibostee,mineraalwater of sodawater.

Vir TAMATIESAP :

Was en sny tamaties in stukke. Plaas in kastrol.

Druk effe stukkend om van die sap vry te stel.

Sit deksel op en verhit stadig tot kookpunt. MOENIE water byvoeg nie.

Kook 5 min lank stadig tot sag maar nie pap nie.

Jy kan dit ook sag stoom. Vryf nou die sap met 'n houtlepel deur 'n draadsif.

Voeg 2,5ml sout en 5ml suiker by elke 500ml tamatiesap.Laat afkoel.

(Worchestersous en peper is opsioneel) 

Geniet dit!

 

29 Julie

Dagsê Lesers!

 

Marita Botes vra : Wat is preie en hoe lyk dit?

Beste Marita,

Ek het waarna jy soek!

Koop jy dalk die SARIE? Wel in laasmaand se uitgawe was 'n hele

resepte bylaag in samewerking met STORK net oor PREIE!!

Jy kan op die SARIE of die STORK webtuistes gaan kyk daarvoor as jy dit gemis het,

maar ek plaas sommer 'n (verwerkte!)uittreksel daarvan hier vir jou op ons werfie.

Preie is LEEKS in Engels en behoort aan die uie familie, en is heerlik in enige gereg

waarin jy uie sou gebruik, dit het net 'n sagter romeriger smaak as uie. Heerlik!

VIS EN PREI QUICHE 

1 vel (400g) broskorsdeeg ( of jou eie staatmaker kors resep)

30ml margarine of olie vir braai

4 preie in skywe gesny ( of 2 vars botteruie )

2 knoffelhuisies fyngekap

3 blikke (170g) salm of tuna  gedreineer.

1 groot tak dille fyngekap of pietersielie

Sout en growwe swart peper na smaak

3 eiers

500 ml room,of ongegeurde yoghurt

Verhit oond tot 180 grade C. Voer ‘n tertbak met die broskorsdeeg uit.

Braai die preie en knoffel tot sag. Rangskik preie op deeg,  skep die vis  by.

Sprinkel pietersielie of dille oor, geur met sout en peper.

Klits die eiers en room, en giet bo-oor preie en vis. Bak tot goudbruin en gestol.

Sit warm voor saam met slaai.

 

 Susan Myburgh skryf: Goeie dag,ek wonder of julle my kan help.

Ek het 'n resep verloor met ons laaste trek, dit is 'n wafel sous resep,

ek het dit altyd gemaak uit 'n ou sasko resepte boekie van my ma.

Dit was so heerlik en ons mis dit.  Dit was 'n soet sous, dit is 'n sous wat jy op die stoof maak ,

warm bedien op wafels.

Die sous waarna ek verwys het 'n basis van suiker,melk, dan weet ek nie verder nie.

kan iemand my dalk help?sal baie bly weees !

Beste Susan!

Ek werk hieraan vir jou! My argiewe word deurgeblaai! Jy soek na die een met die

suiker en melk basis, wat ‘n basiese karamel sous is,en ek sal aanhou soek tot

ons die regte SASKO een opspoor! Tot dan, hier is solank vir jou ‘n paar ander

om uit te probeer!

 KARAMELSOUS

 250 ml (1 k) suiker

100 ml water

300 ml room

100ml vars lemoensap

skil van 1 lemoen, fyngerasper

15-30 ml (1-2 e) brandewyn en Van der Hum-likeur

1 Verhit die suiker en water saam oor lae hitte tot die suiker gesmelt is.

2 Verhit tot kookpunt en kook totdat dit ‘n karamelkleur het.

3 Verhit en voeg die room by. Wees versigtig, want dit sal spat.

4 Voeg die lemoensap en -skil, brandewyn en Van der Hum-likeur by.

 SJOKOLADESOUS

200 g sjokolade van goeie gehalte, grof gekap

180 ml dun room

½ houer (220g) Nutella-sjokolade-haselneutsmeer

60 ml Frangelico-likeur

1 Sit die sjokolade en room in ‘n bakkie oor ‘n kastrol pruttende

water (die bak moenie aan die water raak nie).

2 Roer tot die sjokolade gesmelt is.

3 Voeg die Nutella en likeur by en maak dit deurwarm.

4 Verwyder van die hitte.

5 Plaas kleefplastiek op die oppervlak van die sous om te

voorkom dat n skil bo op vorm.

 

LEMOENSTROOP

125 g suiker

60 ml lemoensap

160 ml water

2 heel steranys

1 vanieljepeul

30 ml lemoenlikeur

1 Verhit die suiker, lemoensap, water en steranys in ‘n kastrol oor

matige hitte en roer tot die suiker opgelos is.

2 Sny die vanieljepeul oop en skraap die saadjies uit.

3 Voeg die vanieljesaadjies en -peul by die suikerstroop en bring

tot kookpunt.

4 Verlaag die hitte en laat prut tot ‘n dik stroop gevorm het.

5 Verwyder van die hitte en roer die lemoenlikeur by.

 

 Rita vra :Wat kan mens doen vir naels wat so breek!! Behalwe om Clicks vals

naels te koop of gel naels! Dankie! Rita

Liewe Rita,

Ja sjoe! Hierdie een bly ‘n tammeletjie! En ons wil almal so graag pragtige en

versorgde naels en hande hê! Ekself het net nou die dag weer "gelus" om ‘n

pakkie aanplak naels aan te skaf! Voor ek dit egter toegepas het, het ek by

‘n nael deskundige gaan aanklop vir raad,en die eerste wat sy gesê het is,

AS jy "Clicks" naels  wil probeer, om nie hul gom te gebruik nie maar by ‘n

nael terapeut die regte gom wat met akriel naels gebruik word aan te koop

en die kuns naels eerder daarmee te heg. Dit haal glo "asem" en beskadig

nie die naelbed soveel soos die ander gom nie.

Die naels moet egter nie vir langer as 10 dae aangehou word nie.

En moet onder geen omstandighede aan die naels trek krap of dit probeer afskeur nie!

Dit moet afgeweek word met asetoon, die beste manier is nie om jou vingers in ‘n

bakkie te week nie maar te maak soos die  kundiges, draai ‘n geweekte watte lappie

om elke nael en maak elkeen met foelie toe, hou dit ‘n ruk aan en die naels behoort

sag af te kom of op te los, verwyder die hardnekkige stukkies met ‘n stomp tandestokkie.

Klaarblyklik verskil baie terapeute oor die gebruik al dan nie van kunsnaels- te verstane,

dit is hul inkomste,en wil baie daarom ook nie graag erken dat jou naels wel skade

kry met die aanhoudende gebruik van gel en akriel naels nie. Dit is egter so.

Die naelbed word dunner, sagter, swakker en meer  geneig om te breek in

te skeur en te hak.Dit neem ook tot 8 maande lank om vanself uit te groei en

volledig te herstel, en omdat die proses so vol pyn en moeite is, hou meeste vrouens

aan om onbepaald eerder die gel naels te dra! Die dame met wie ek gepraat het self,

gebruik al die afgelope 9 jaar pragtige akriel naels, maar beveel aan dat ons liewers

 nie eers moet  begin met gel of ander naels nie, maar ons naels self moet  versorg of

 laat versorg, te "buff" en te  poleer en dan 2 lae versterkende naellak kleurloos of gekleur

 2keer per week aan te wend. Laat rus dan die naels so elke tweede week vir ‘n dag of twee

tussenin. Sy beveel  veral "Sally Hansen" aan.

Dit beteken nie dat ek gel of akriel naels afskiet of beledig of sê dis uit nie!Vir daardie

spesiale  geleentheid, doen dit proffessioneel en verwyder dit proffessioneel.

Soos aan alle dinge in die lewe is daar voor en nadele, kom ons doen dit met balans

en die nodige oordeel, en beskerm ons naels ten beste tussen in.

 Hoop dit kon help!

 

25 Julie

Dagsê Lesers!

WENK vir die week wat volg : Om heeldag by die werk te sit, veroorsaak rug probleme.

Probeer om elke 15 minute op te staan en jou bene te beweeg.

Maak ook seker dat jou knieë hoër as jou sitvlak en heupe is terwyl jy sit.

Daar is 'n gediggie wat sê:

As ek geweet het dis die laaste keer

dat ek jou aan die slaap sou sien raak,

sou ek meer moeite gedoen het

om jou warm toe te maak.

As ek geweet het dis die laaste keer

wat ek jou by die deur sien uitloop,

sou ek jou gedruk en gesoen het -

en jou teruggeroep het vir nog 'n drukkie.

As ek geweet het dis die laaste keer

dat ek jou stem sou hoor,

sou ek dit op band op geneem

het sodat ek dit weer en weer kon speel.

 

Ons leef so asof daar nog baie tyd oor is om

alles te doen wat ons graag wil . maar sê nou vandag was die laaste kans !

Die Bybel sê:

" ons is maar 'n damp wat 'n oomblik verskyn en sommer weer verdwyn. "

Kom ons maak vandag tyd om te sê:

'Ek is jammer' of 'dankie' of 'ek waardeer jou'!

As môre dalk nie daar is nie, kom ons leef vandag voluit !

 

Resep vir die  naweek:

‘n Interesante variasie van die gewone SAGO poeding!

1 l melk

1 kaneel stokkie

90 g (1/2 kp) sago

70 g(1/4 kp) suiker

60 g botter

1/4 t (1 ml) sout

4 eiergele

1/4 t (1 ml) neutmuskaat

1 t vanilla

Bring melk en kaneelstokkie in ‘n 2l kastrol tot koopkpunt.

Verwyder van hitte.Voeg Sago  by en sit deksel op. Laat week vir sowat 1 ½ uur .

Voorverhit oond tot  160C.

Klop mengsel. Bring stadig tot kookpunt, roer vir eerste ruk aanhoudend om te

keer dat dit brand (Jy kan dit ook in Mikrogolf doen)

Kook tot sago deurskynend is.Verwyder die kaneelstokkie.Laat effe afkoel.

Klop eiergele, vanilla  en neut  en klits dit  dan tesame met die botter  en suiker

by sago  mengsel in.Skep in ‘n gesmeerde 2l tertbak.

Halfvul ‘n groter oondbak met water  (jou bain marie) en plaas jou bak met sago daarin .

Bak vir 1 ½ uur tot geset en goudbruin.

Haal uit oond en smeer 1/4 kp appelkoos konfyt  bo-oor.

Vir meringue bolaag :

4 eier witte

2 Etl suiker

1/4 t (1 ml) kremetart

Klits die eierwitte en kremetart liggies terwyl jy die suiker bietjies-bietjies byvoeg.

Klits tot stywe punte vorm.

Smeer bo-oor die konfyt gesmeerde  gebakte sago.

Bak nog 20 min tot die meringue  goudbruin  bo-op is.

Bedien warm of koud.  

 

22 Julie

Dagsê Lesers!

Geluk is ‘n Keuse.

Geluk is die krag gesetel in ons natuur om hoër uit te styg as die uitdagings wat

ons soms in die gesig staar.Dit is ook om te weet

dat soveel as wat ons toelaat sekere situasies ons hartseer maak, ons ook kan kies

om op die gelukkige oomblikke te fokus.

Wees daarom doelbewus minder harteer en meermale meer gelukkig!

( Vry vertaal. Gedagte van P Khanyile )

 

 ELIZE VILJOEN skryf :  WAT N LEKKER WEBSITE. HET NOU SO LEKKER GEKUIER.

 HET JY DALK N "SNACKLE-DOPPIE" RESEP VIR MY, ASSEBLIEF. DIT KOM VAN JARE

 TERUG DAN HET DIE HANDVATSEL 3 VORMPIES WAT JY IN N BESLAG DRUK EN DAN IN

DIEP OLIE BRAAI. AGTERNA VUL JY DIT MET SOET OF SOUT VULSEL.

GROOT ASSEBLIEF. DANKIE RETHA. GROETE

 Liewe Elize,

Dit is vir my verskriklik lekker om op jou navraag te reageer!!

Dankie dat jy saamkuier, en jammer jy moes wag maar ek moes gaan soek na die resep.

Ek weet presies waarna jy soek  en hier is die oorspronklike resep wat saam met daardie

produk gekom het!! Dis in my eerste resepte boek opgeteken as

 " MEIS SE WAFELTJIE VORM RESEP"( My sus was toe al getroud en ek nog op skool

 en sy het so 'n dingetjie gehad!!.... Kan jy glo!

1. Klits 2 eiers,2tl suiker en knippie sout

2. Voeg 1kp melk by

3. Klits goed

4. Voeg 1kp meel by

5. Meng tot glad

6. Maak vorm goed in die olie warm voor in deeg doop, en let daarop dat die deeg

nie oor die bokante ook is nie!

7. Vul doppies met soet of sout vulsel net voor bediening.

 Ek onthou sy het hare altyd met 'n caramel-vla of 'n tuna-mayonaise vulsel gevul.

Dit was altyd 'n treffer! Hare het skoenlappertjies, harte, "spades"  en sirkeltjies gehad!

Voila!! Geniet dit! 

 

Dagsê Liewe lesers !

 JA-nee, die winter het ons in sy wurggreep, maar sonder die winter kan ons immers nie

 uitsien na die komende lente nie !

 Die gesegde lui mos nie verniet, dat diegene wat die reënboog soek,

 ook die reën en donderweer moet verduur nie.

 So, al waai die wind 'n hond uit 'n bos, en klapper ons tande, geniet die Winter,

 en alles wat daarmee gepaardgaan en wees bly ons kan dit alles beleef, want dit beteken ons LEEF !

 Ek wil graag aandag gee aan die volgende navrae en vra omverskoning dat jul so lank moes wag!

 

Diana Moolman, het gesê : My vriendin is 'n diabeet en is ek op soek na warm nagereg

 resepte om te maak noudat dit so koud is. Kan jy my dalk help.

 Beste Diana,

kom ons probeer, jy het al my ander raad hieroor gelees?

 In KAMMANUUS sowel as hier op die werfie het ek al so een en ander oor hierdie onderwerp

 gelaat, maar onthou asseblief, ek het dit al genoem, ek is nie 'n dieetkundige nie, so

 ek maak ook net staat op ander se inligting!

 Onthou, verminder die suiker en vette sover jy kan,en vermeerder die vesel inhoud.

 Hoe stadiger die suikers vrygestel word hoe beter kan die diabeet dit hanteer.

 Probeer die volgende 2 resepte wat ek raakgelees het: (Bron :www. Soettand!)

 EK SOU DIT EGTER AS VOLG AANPAS, sien tussen hakies.

 APPEL EN DADEL POEDING 

250ml koekmeelblom ( Vervang met 200ml koekmeel en 50ml hawersemels of oatbran)

 3ml sout

10ml bakpoeier

5ml kaneel

500ml witbroodkrummels (Vervang met lae GI bruinbroodkrummels)

2 appels, gerasper (Ek sou self nog 'n appel byvoeg, en LW gebruik die

Granny Smith appels! En rasper dit MET die skil aan.)

125ml dadels, gekap

125ml suiker (Vervang met 100ml se aanvaarbare versoeter vervang en

eerder nog 25ml dadels by)

100ml botter (of Canola Margarien)

1 eier

30ml gouestroop (Vervang met 20ml heuning)

80ml melk ( afgeroomde melk)

Voorverhit die oond tot 180ºC.

Sif die koekmeelblom, sout, bakpoeier en die kaneel saam.

Meng dit met die witbroodkrummels, appels en die dadels.

Veroom die suiker en die botter.

Klits die eier en die gouestroop by dit.

Meng dit saam met die melk en die droë bestanddele.

Bak dit vir 45minute.

 

OUTYDSE KLAPPERPOEDING 

2 groot eiers

 125ml suiker ( Vervang weereens met 100ml se suiker ekwivalent versoeter)

250ml witbroodkrummels (Vervang met lae GI Bruinbrood krummels)

250ml melk (Afgeroomde melk)

250ml klapper

1ml sout

Voorverhit die oond tot 180ºC.

Klits die eiers en die suiker saam totdat dit lig en dik is.

Roer die broodkrummels, melk, klapper en die sout by.

Meng dit goed en giet dit in ‘n gesmeerde oondvaste bak van 20x15cm.

Bak dit vir 45minute totdat dit goudbruin is.

 

 Liza Hollenbach,het geskryf :  Ek is altyd opsoek na outydse resepte dit is die

 lekkerste ek gaan jou kluitjies aflaai jy kan gerus meer male vir my stuur baie dankie.

 Dankie Liza,

ek hoop jy sal nog baie lekker resepte hier op ons werfie raaklees!

Laat weet as jy ook iets spesifieks in gedagte het!

 

 Annamarie vra: Weet iemand dalk iets van epilepsie "grand mal" bietjie raad

kan gee ek google dit alreeds is moeilik om alles te verstaan.

Liewe Annamarie,

dis is juis nou net  Nasionale Epilepsie week gewees, 15-21 Junie,

en baie  inligting is beskikbaar op die werf : www.epilepsy.org.za

 In kort, Epilepsie word gekenmerk deur herhalende stuipverwante aanvalle oor 'n

uitgebreide tydsverloop.Dit affekteer nagenoeg 1 uit elke 100 mense, maar 80% van

gevalle kan beheer word met die regte medikasie.

Epilepsie kan die gevolg wees van brein beserings na 'n ongeluk, infeksie, hormonale

probleme, sirkulasie probleme of gewasse. Party kinders word daarmee gebore.

In die meeste gevalle is die oorsake egter nie duidelik nie.

Aanvalle kan veroorsaak of mee gebring word deur 'n hele spektrum faktore, o.a. spanning,

sekere visuele stimulasie, soos flikkerende ligte,alkohol en dwelm/medikasie gebruik,

slaap deprivasie, 'n verandering in dieet of medikasie, oormaat kaffeine en swak

eetgewoontes wat lae bloedsuiker vlakke tot gevolg het.

Gedurende die aanval is daar onbeheerde en abnormale vrystelling van elektriese en

chemiese aktiwiteit in die brein wat intens en vinnig versprei tussen die senuweeselle

in die brein. alhoewel die aanvalle sodanig nie lewens bedrygend is nie, is die newe

effekte of nagevolge van die aanvalle wel potensieel fataal.(bv. aanvalle tydens swem,

voertuig beheer, verstikking of versmoring tydens aanval, val en beserings tydens aanval )

Dit is daarom belangrik dat elke mens kennis behoort te dra van wat om te doen ingeval

daar iemand 'n aanval in jou teenwoordigheid kry, en dat die regte medikasie aan die

persoon met epilepsie verskaf word. 

 

Annabelle uit Doha skryf :Hallo Retha,Werk die koper wenke ook vir silwer?

Beste Anabelle,

ek sou nie noodwendig dieselfde raad vir Koperware as vir

Silwer gebruik nie,sekere sure en soute sal die silwer juis laat verswart,

probeer liefs die volgende :

Gebruik 'n kommersiële  produk soos Goddards, of Vryf jou silwer ware af

met 'n halwe suurlemoen en spoel af droog en poleer.

Of week oornag in 'n mengsel van koeksoda en asyn, borsel dan liggies

met 'n tandeborsel.

Jy kan selfs die silwerware met Maizena of babapoeier afvryf hoor ek!

 

Ans Jacobs,Nylstroom wil weet : Wat beteken: "mapstieks"

eintlik en waar kom dit vandaan??

 Beste Ans,

die woord "mapstieks"  word gebruik as uitroep van

verbasing soos gewoonlik in : " Alla Mapstieks ! "

Die herkoms daarvan is 'n eufemisme (versagtende vorm) van ons eie

Afrikaanse volks etimologiese vorm van "O Magtig ! " Inderdaad ja!

 

Dan wil ek jul ook  vertel van nog 'n gratis resepte werf : www.soettand.co.za

Gaan loer gerus of daar dalk iets is waarna jy al lankal soek.....Maar !!!

Moenie van ons af wegbly nie, hier is dalk net daardie stukkie uniekheid

wat jou hart laat warm klop!

Mooi bly, Vra gerus, ek probeer graag help ! 

 

Waarna verlang ons? Dalk beslis nie net na kos nie,

maar dit is tog asof ‘n bekende resep ‘n mens al wil-wil laat tuis voel

wáár mens jouself ook al bevind!

Vandag se resepte is vir diegene wat van die werk wil

afkom en sommer dadelik ‘n tuisgemaakte bord kos wil inskep,

sonder om eers voor die kospotte hoef  in te skuif!

 En dit is boonop genoeg  dat daar sal oorbly vir  nog ‘n keer se eet!

Maak dus en vries of bêre ‘n porsie daarvan vir nog ‘n aand se mikro-opwarm!

Die volgende resepte is geskik vir  voorbereiding in ‘n PRUTPOT

(Slow-Cooker) of in ‘n keramiek pot in die oond. (Argilla potte werk uitstekend)

Wanneer jy hierdie geregte in die oond wil maak, kan dit so @ 2uur Middag

in die oond gesit word op 150 - 180grade en sal gereedwees @ huis toe kom tyd.

Oond tye  het gewoonlik sowat 2- 3 ure bak tyd nodig. Gebruik dus die oond metode

oor naweke of wanneer jy nie te haastig is nie. Kos is gaar wanneer daar nie meer

bloed uit die vleis kom as jy dit  langs die been  oopsny nie en wanneer die sous

heilsaam dik en geurig daar uitsien. Dit kan egter ook oornag  @ 150 grade  gaar

gemaak word, die volgende oggend goed afgekoel  in yskas gehou word vir

opwarming na werk, maar dit is nie die ideaal nie.

In die PRUTPOT kan dit egter  vinnig soggens voor werk alles in die pot gegooi word,

en as jy vanmiddag instap is dit gereed vir eet!

En hoe lank kan die kerf van ‘n piesang of ‘n tamatie daarby jou vat?

 

RYS kan by meeste geregte gevoeg word, of apart gekook word.

Apart : In Mikro, kook 1kp Rys, 2kp water en bietjie sout vir 25-30 minute op Hoog.

Gaar Rys hou veilig vir 5 dae in yskas.

Of maak een aand vir jou ‘n koppie Ryspoeding saam met jou ete!

Of probeer die roerbraai opsie hieronder...

Wanneer jy Rys saam met die gereg maak, plaas altyd 1kp Rys + 2kp water

onder in die bak/pot en dan volg die res van jou resep...

Roerbraai fyngekapte groenrissies, sampioene en uie tot gaar en goudbruin,

geur met aromat, pietersielie (verkieslik vars ongedroog), tiemie, swart peper

en bietjie Sojasous.

Roer gaar rys in en roerbraai alles vir nog ‘n minuut saam.

 As daar hiervan oorbly, kan jy more aand net ‘n gekapte tamatie, gebraaide spek

of hoender stukkies en ‘n groot lepel Mayonaise byroer, en Voila!!

 Nog ‘n vinnige slaai of kitsete

 

Vir RYSPOEDING:

Kook 2 kp melk op, voeg 1kp gaar rys daarby.

 Klop 2 eiergele met 125ml suiker en knippie sout en roer dit by die

warm melk en rys in.

Vou nou 2 styfgeklopte eierwitte in, en 2.5ml vanilla

of 2 Etl appelkooskonfyt.

Skep in gesmeerde bakskottel en bak in oond by 180 grade C

tot gestol en mooi goudbruin. Dien op met heuning of gestoofde

droë vrugte!

Jy kan selfs die geklopte eierwitte i.p.v inroer , bo-op sit vir ‘n

meringue-lagie, in die geval klop 25ml suiker saam met die

eierwitte tot styf, smeer bo-oor en bak dan.

 

Kerrie (...en Rys)

Braai uie tot sag en goudbruin in pannetjie op stoof.

Roer daarby 1 - 2 tl kerrie, 1tl borrie, 1tl gemengde vleis speserye,

sout en peper, ½ kp appelkooskonfyt en ½ kp sultanas.

Plaas  vleis ( beeskook, skenkels, skaaprib, maalvleis...) onder in pot

( of bo-oor rys en water in pot)

Bedek vleis met ‘n lagie  ertappels en 1kp gevriesde gemengde groente.

Skep nou uie en speserye mengsel bo-oor.

Sit pot se deksel op, stel op outomaties of Med Hoog, en gaan werk!

  

 Hoender (....en Rys)

Strooi bietjie bruin uiesop poeier onder in pot of  bo oor rys .

Peper na smaak NIE SOUT NIE, die soppoeier het genoeg in!

Bedek met lagie van opgesnyde 2wortels, 2ertappels, 500g sampioene en 1 ui .

Strooi lagie bruin uiesop poeier bo oor.

Plaas nou 5 hoenderporsies ( tjoppies of frikkadelle) bo-op groente,

nog soppoeier, vleis of hoender speserye en nog 125 ml water.

Sit deksel op sit pot aan en gaan werk...

 

Skaapnek...

6-8 Skaapnek "tjops"

200ml koekmeel, sout, peper en aromat

3 ryp tamaties in skywe gesny.

1 groot ui in ringe gesny

100ml Chutney, 50ml tamatiesous en 200ml water.

Meng meel, speserye in plastieksak, en skud die "tjops" daarin tot goed

bedek met meel en speserye.

Pak nou lae vleis, tamatie en uie in pot.

Meng die Chutney, tamatiesous en water en gooi bo oor.

Sit deksel op en laat prut tot jy huis toe kom!

  

En Sjoe!! van vleis alleen kan mens tog nie lewe nie!

 

Pasta-gereg.

 

1kp Pasta , 125ml gekapte spek / maalvleis , 1 gekapte ui, groenrissie en

 sampioene opsioneel, Aromat na smaak, 60 g sampioen of wit uie sop poeier,

 2 kp melk.

 Meng alles saam en plaas in Argilla bak.

 Mikro dit vir 20 - 25 minute op hoog en laat staan vir so 5 minute voor opdiening.

 Lekker  saam met ‘n slaaitjie.

 Of,  Meng alles saam en plaas in Prutpot, sit deksel op en gaan werk!

Wanneer jy tuiskom strooi 1kp gerasperde kaas bo-oor gereg.

 

Boontjie Bredie.

Ja- ja, jy kan ook hierin klein stukkies skenkelvleis of spek heel onder in pot sit!

Meng 2 kp gekerfde groenbone, 3 middelslag aartappels in blokkies, 1 gekapte ui,

1 gekapte tamatie, 2 Etl margarien of 2 Etl room, sout en peper na smaak.

Bedek en laat prut!

 

Vinnige Vis-dis!

750g Stokvis (Hake)

250ml room of melk

 1pk wit uie soppoeier

3 tamaties in skywe en 1 groot ui in ringe gesny

Handvol kaas.

 Pak vis, tamatie en uie in pot, (met of sonder rys) of bo op enkel lagie klein

 ongeskilde aartappeltjies .

 Meng res van bestanddele en gooi bo oor vis. Sit deksel op en prut tot gaar.

 OF

 Bak in oondbak OOP @160 grade C op middelste oondrak vir sowat 45 minute.

 Gooi kaas oor wanneer gaar.

 Heerlik saam met wortel-ertjies of slaai.

 Voila! Hoop dit sorg vir ‘n paar  aandetes sonder moeite!

 

 

Liewe Lesers!

Saam met die Herfs het die verkoue en griep simptome my neus en keel

betrek tot 'n benoude  kuggie en waterige ogies, die geheim van hoendersop en

baie tee is al wat werk! En hier op die plaas, as die tissues opraak dra jy sommer

die hele toiletrol met jou saam!

Selfs die skaaphond lê al met sy pote oor sy ore teen al die gesnuit en mý geblaf

en wens vir 'n stappie maar helaas !Tog is die absolute Herfs-stilte hier om my vredig,

jy kan amper die blare hoor val. Ek het net hierdie week vir die tuinman gevra om

asseblief die blare te los, die geweghark en wegvat van blare is myns insiens totaal

onnodig en verspot, hoe kan jy ooit Herfs wil wegvee en in sakke stop om op 'n

vullishoop te gooi? Los die blare dat dit val en dwarrel en draai en die sonlig kan weerkaats!

 Elke bruin oranje en geel wonderwerk  die voorspel tot die wit van die winter, die warm

kleure wat mens moet inasem vir die koue wit dae wat kom bly kosbaar, soos speserye

oor pannekoek, dis wat die herfs vir my is, die speserye oor die winterwit.

 

Ons het al almal hanne-innie-hare gesit oor hardnekkige en ongewenste vlekke.

Wel, vandag se Wenwenke  is :

*Behandel alle vlekke so gou moontlik!

*Gebruik altyd ‘n handdoek of handdoekpapier aan die onderkant van die vlek

 sodat die vloeistof en vleksousies nie deursyfer na die materiaal daaronder nie.

*Sommige kolle sal deur hitte weerstandig gemaak word  maar VET en KERRIE

word maklik uit wasbare  materiaal verwyder deur kookwater uit die ketel

 vanaf ‘n hoë afstand daarop  te gooi.

Maak jou kledingstuk met wasknypers om die rand van ‘n skottel vas met die vlek in die

middel en gooi die kookwater dan vanaf sowat 1m direk daarop. Was gewoonweg daarna.

*Baie vlekke op wit of kleurvaste materiaal reageer gunstig op Domestos, Handy Andy, of

‘n spuitsel Doom, pas net op dit kan ander kleure bleik!

Probeer ook Suurlemoensap,  Bloekomolie en waterstofperoksied op ‘n vlek

voor jy moedeloos raak!

*Alkohol vlekke : verwyder met een deel wit asyn en 3 dele louwarm water.

*Beetvlekke : Vryf vlek in met sout en spons daarna af met warm water.

Of gooi Boraks op vlek en  giet kookwater daarop soos hierbo verduidelik.

*Bloed : Bedek vlek met vleis-sagmaakmiddel (Meat Tenderizer) en bietjie

koue water. Week so rukkie en was in koue water en seep.

Ou bloedvlekke kan met ‘n pasta van mielieblom ingevryf word en in die son

laat lê word om te bleik. Vlekke kan ook oornag in wit asynwater geweek word.

*Ink : Vryf vlekke uit met wit Spiritus of Dettol. Vlekke op ligte leer, kan met

Wit dulsies uitgevryf word. Inkkolle kan ook in melk of karringmelk geweek word,

of hou die kol klam en sprinkel Steradent daarop, was daarna met amoniak en

warm water.

 *Ghries en olievlekke: vee vlek af met Dettol en spoel in skoon water,

of week vlekke  in Dettol en was daarna .Of spuit met Doom, wag rukkie en was dan.

*Gom se moses is wit asyn of brandspiritus.

*Kougom : sit kledingstuk in vrieskas en krap dit later af, of  gebruik  Doom, en vryf af.

*Droë Modder: borsel dit af en vryf dan met ‘n halwe rou aartappel, borsel weer af

wanneer droog, was dan soos gewoonweg.

*Moerbeivlekke, vryf met ‘n groen moerbei of moerbeiblaar oor vlek en was gewoonweg.

*Mufkolle : Dis ‘n Fungus en nie ‘n vlek nie en kan materiaal vernietig, smeer kolle

in met seep en laat in son droogword voor jy dit was.Herhaal tot kolle verdwyn.

Dit kan ook oornag in suurmelk geweek word ( as jy nie suurmelk het nie meng

1kp melk met 2Etl suurlemoensap)

Dit kan ook oornag in ‘n chloorkalk oplossing geweek word,

laat eers uitdroog voor jy dit was.

Vryf kleiner kolle met waterstofperoksied, laat droogword en was daarna.

*Strykyster Skroeimerke : Net as die materiaal nie beskadig of deurgebrand is nie!

Vryf vlek met ‘n halwe ui, en spoel daarna uit in koue water.

 Genoeg van vlekke, laat weet maar as jy nog hardnekkige

vlekke het wat nie na dese wil uit nie!

 

Liewe Lesers!

 Ja-nee, ek hoop en vertrou dat dit met jul almal wel is? Wel ek het heerlike nuus!

Ons was bevoorreg om weer vir amper drie weke in Namibië te gaan toer, en daardie

land se mooi  kry jy nooit uit jou siel nie!

Dit is soos asemhaal en rooiwyn voor ‘n kaggel...welbehaaglikheid op sy beste!

Wel met al die kampery, kan ek nie anders as om hierdie bydrae met jul te deel nie,

dit kan net nie anders nie en moet handel oor KAMP en KAMPKOS!!

Die beste raat wat ek het, is om nooit te veel  goed saam te piekel nie want die

lekkerte lê dikwels verskuil in daardie planne wat jy moet beraam vir daardie

"iets-maak-in-die-plek-van-iets-vergete!"

En my tweede beste raat? Geniet dit net!!Alles, nes dit kom!Vergewe jouself jou

deurmekaar kapsel, en jou doelbewuste vergeet van die tegnologiese eeu waarin

ons leef, vergun jou net die luukse van ‘n kamera, en die genade van

Bo wat jou alles gun...

 

Saam met ons kole-steak was die volgende Sousie telkens die wenner:

Sny 1 ui, 1pak sampioene,1soetrissie in stukkies en braai in olie.

Roer daarby 1klein houertjie room in en kook oor stadige hitte.

Meng nou 2 kp melk met 1 pakkie Knorr / Royco RomerigeKaasSous en 1

pakkie SwartPeperSous.Gooi dit by res van  bestanddele in pot. Roer tot weer opkook.

Heerlik!

 

Die WEG het so ‘n tyd gelede ‘n klein kampkos boekie uitgegee, en ons het ‘n

paar daarvan ook uitgetoets!

VARKTJOPS IN FOELIE

6 stukke foelie

6 varktjops

botter

1 groot papat in skywe

2 appels in skywe met skil

sout en peper na smaak

suiker

gemmer

Smeer die foelie met botter.

Braai tjops oor kole vinnig tot net bruin, en sit op foelie.

Sit skyfies patat en appels op elkeen, geur met die res van die bestanddele na smaak.

Vou netjies toe en rooster verder oor warm kole vir sowat halfuur!

 

ASKOEK

1kp bruismeel

1tl bakpoeier

1tl sout

¼ tot ½ kp warm water

1 Etl Olie

 Meng meel,bakpoeier en sout.

Meng water  en olie in tot slap vormbare deeg. Rol  in ‘n bal, en druk plat.

Sit die "koek" op die kole en skep ‘n paar kole bo-op.

Laat bak vir sowat halfuur.Skud as behoorlik af en Voila!!

 

Liewe Lesers!

 Ek het  intussen nog 'n baie interessante brokkie nuus ontvang vir Termiet en

 Rysmiere wat 'n probleem is!

Rysmiere  vreet nie soseer die gras ens. wat hul indra nie, maar "kweek" daarop

mikro sampioentjies!! En dit eet hul dan graag! Die hele proses van organiese afbreek

 en verrotting jul weet mos?

Hul teer dus eerder op die newe produk wat bietjie verder op die voedselketting

 plaasvind as op die  gras of saagsels...

Wenkem het laat weet, dat  goeie raad is, om orals waar die rysmiere in die

veld of in store waar hul maklik opspoorbaar is, 'n groot hoop kaf, strooi of saagsels

wat met swamdoder deurdrenk is te gooi. Die Rysmiere dra dit dan in hul neste in,

hul vrek nie soseer daarvan nie maar aangesien geen swamme kan groei om dit

verder af te breek waarop hulle kon teer nie, het die termiete of rysmiere sodoende

nie meer kos nie en trek hul weg  na jou buurman se veld waar daar nie

 swambestrydende kos is nie...!

 Enige kommentaar hierop is meer as welkom!

 

Dagsê Vriende,

Hier in die Karoo word dit nou sterk Herfs en die blare-tapyte verander nou

daagliks in geel-oranje intensiteite! Tyd vir Trooskos is amper hier, maar ek

sal dit nie vooruit loop nie, die kaal stam wit gerypte wintertyd  voor warm

kaggels kom wanneer dit moet!

Vroegoggend hier by ons as die misbank lig en dit groendruppelkristalle op die

oggendgras en lusern agterlaat om die son te kaats, stap wit ganse  lui drentellend

al langs die appelkoos boord op en gesels luidkeels snawellend oor hul nat pote, en

wanneer die punte van hul vlerke kort-kort die lug in klap, gooi  hul 'n wasige sproeireën

oor mekaar uit, dan lig die koppe op die lang nekke soos wafferse swane

en word luidkeels van vooraf geraas!

 

Vra ‘n leseres my, Antjie, wat maak mens dat die konfyt nie uit die konfyttertjies uitkook nie!

En Mariet vra hoe maak mens koper blink?

 Wel Antjie, jy kan

*of probeer om die skilferkors doppies eers te bak en dan die konfyt na die tyd

met ‘n versierspuitjie in die gaar tertjies te spuit,

*of,  plaas op die onderste skilferkors  sirkeltjie nog een met ‘n gaatjie in die middel,

wanneer dit bak  maak dit  ‘n lieflike doppie waarin jy die konfyt

(of selfs melktert vulsels met kaneel oor) met ‘n teelepel in kan skep.

Doen die konfyt inskep wanneer die doppies nog warm uit die oond kom.

Die melktert vulsels  as dit reeds afgekoel het anders word die skilferkorsdoppies pap.

*Wanneer jy toe tertjies wil maak, verseël jou rou tertjies deur dit toe te plak en

te verf met eierwit.

*Nog raad is om die konfyt weer oor te kook tot dit goed dik is,

*of meng die konfyt vooraf met ‘n bietjie meelblom.

 

Om Koper blink te maak is daar baie raad, kies dus maar self watter een jy op die

proef wil stel Mariet!

 My gunsteling is gewone suurlemoensap of asyn of tamatiesous (ja regtig!) of as

ek erg haastig is, was ek gewoon die kopergoed af met wat ons Saners ken as Domestos!

Ek vryf dit net liggies oor die merke en blinkgoed, en spoel dit onder baie warm

water af en Voila!

Maar eerlik? Niks kom werklik by die gewone elmboog-aksie van afvryf en poets nie,

so moenie dit vir altyd uitlaat nie.

En moenie die kalmerende uitwerking hiervan onderskat nie. Gaan sit met jou bene

uitgestrek op ‘n lekker dik kombers in die wintersonnetjie, verskans agter ‘n

spreekwoordelike kraalmuur buite bereik van die windjie, en gesinslede wat jou

wil pla, jou kopergoed soos glinsterende juwele om jou uitgestal in die bleek sonnetjie,

‘n koppie tee langs jou en net die stilte van jou herfs of wintertuin as begeleiding.

Maar jy kan enige tyd die volgende  meer "tradisionele" wenke ook  probeer:

*Verwyder vlekke deur ‘n halwe suurlemoen in sout te doop en daarmee oor die

vlekke te vryf, was dan en poets soos gewoonlik met koperpolitoer.

*Gooi bietjie brandspiritus by Brasso en die koper sal nie net pragtig blink nie dit

sal ook nie weer so gou aanslaan nie.

*Week die koper in ‘n oplossing van 12.5ml Harpic in 1 L water. Was dan met

water en seep, droog af en poets.

 *Gebruik ‘n poetsmiddel van gelyke dele vollersaarde, ammoniak en terpentyn,

vryf die koper hiermee en was af in baie warm water, droog af.

*of 1 deel meelblom 1 deel stysel en 2 dele asyn, vryf die koper hiermee en was

 af in baie warm water, droog af.

*wat ook goed werk is , as jy 1l warm water met 5ml wynsteensuur en 5 ml

opwasmiddel meng, was die koper hiermee, droog af en vryf blink.

Spuit dan die koper met haarsproei en dit sal ook nie gou weer aanslaan nie.

*Jy kan ook die koper na dit afgedroog is met ‘n lappie afvee wat in olyfolie gedoop is.

 

Dagsê Lesers !

Twee Kammaland vriendinne het aan ons  die volgende resepte gestuur,

dit klink heerlik! Baie Dankie aan jul altwee! Die kluitjies  resep is werklik ‘n treffer,

dit is heerlik as "bykos" wanneer julle kamp want dis vullend,nie ‘n aparte gereg met

nog skottelgoed nie, maklik en nie net alweer brood, ertappels of pap nie...!

Dis selfs heerlik bo-op opgekookte vars ertjies!

Kook jou erte net op in suiker water met ‘n klontjie botter in, met die degies daarop!

Selfs kinders wat nie erte wil eet nie omdat dit kwansuis so rondrol...

sal nou geen verskonings kan uitdink nie!

Dankie Anita Bredenkamp vir jou bydrae!

Sy sê :

'n Heerlike kluitjie resep wat jy bo-op die vleis in  potjie kos kan sit,

of in die oond bo-oor vleis.

 Kluitjies oor Vleis:

2 K meel

1 t sout

1/4 t peper

4 t bakpoeier

1 eier goed geklits

2 1/2 eetlepel botter of vet

3/4 k melk

Sif die droë bestanddele saam.

Voeg die eier, gesmelte smeer en melk by om 'n taamlike stywe drupdeeg

 bo-op die vleis te sit (nie in die sous nie) Maak dig toe en stowe verder vir

 15 tot 20 minute Moenie die deksel in die tyd oplig nie!

 Dien dadelik op

 

 Mirtie Scheepers het hierdie  Heerlike Gemmerkoekie resep vir ons aangestuur.

Baie Dankie daarvoor Mirtie, ek is seker baie lesers sal bly wees daaroor!

 500 g sagte botter

 500 ml sagte bruinsuiker

 250 ml goue stroop

 sowat 80 ml gemmerkonserf (stukke), gedreineer en fyn opgekap

 1 kg bruismeel

 10 ml elk koeksoda en kremetart

 5 ml sout

 2 ml gemaalde gemmer

 2 eiers, geklits

 ekstra koekmeel, indien nodig

Sif die droë bestanddele by die bottermengsel in en meng goed saam.

Voeg die eiers by en meng saam tot n sagte deeg.  Neem ekstra meel op die

 hande as die deeg te onhanteerbaar is.

Vorm klein balletjies en plaas op gesmeerde bakplaat, of rol uit en druk vormpies uit.

 

Lidia v d Merwe het geskryf : Ek is altyd opsoek na lekker ou en nuwe resepte wat

goedkoop,MAKLIK EN VINNIG is. Oulike idees is ook welkom.

Ek is veral op soek na snack-resepte vir rugby kuiers en verjaarsdae.

Kan iemand help.

Wel Lidia, ek is seker daar gaan heelwat resepte hiervoor vir jou inkom wat ek kan plaas vir almal!

En het jy al na die E-resepte boeke van Anna Eksteen  onder ons ander skakel

 BOEKWINKEL geloer? Daar is voorwaar heerlike treffers!

Omdat jy vir meer as een resep vra, wil ek jou weer vra dat jy ons Kammanuus

NUUSBRIEF sal dophou, ek plaas ‘n hele paar resepte daar vir jou!

 Maar hier is solank ‘n staatmakertjie wat jy kan uitoets:

 MY SAGTE PASTEITJIES

 Breek 2 eiers in ‘n koppie, vul die koppie verder tot vol aan met melk.

 Gooi in mengbak. Klits ½ kp olie daarby.

 Roer 1 kp bruismeel , knippie sout en  ½ tl aromat by.

 (By sout happie, as jy soet vulsel gebruik laat Aromat weg!)

 Skep nou ‘n tl van die sagte degie in ‘n kolwyntjiepan, skep ‘n tl gaar vleis bo-op,

 skep nog ‘n tl deeg bo-oor vulsel.

 Bak by 180 grade tot goudbruin en gaar.

 ** Ek skep sommer  net die deeg  en dan die vulsel met  bietjie kaas bo-oor.

Makliker kan jy nie kry nie! En jou  moontlikhede is eindeloos!

gebruik as vulsel : gaar maalvleis en uie , of blikkies vleis, spek en kaas...

en vir iets soets : room-mielies , ingemaakte stukkies perske of aarbeie of kersies...

met klontjie room .

Stout ek weet, maar ai, soms is room tog so onafwendbaar !

 

 Anna-Marie Jansen skryf die outydse soetkoekie resep

is nou regtig n resep wat sy lankal gesoek het wat van n regte egte melkkos

 resep die outydse een!

Ja Annemarie jy verwys natuurlik na die een met die snysels in?

Wel SO MAAK MENS:

(Uit Anna se ONTHOU JY NOG?)

MELKKOS:

SNYSELS:

3 eiers                                        2,5ml sout

250ml koekmeelblom                   water

kokende melk                             2 stukke heel kaneel (opsioneel)

kaneelsuiker

Klits eiers en sout effens.

Voeg koekmeelblom by en meng goed.

Voeg genoeg water by om 'n stywe deeg te vorm.

Knie deeg lank en goed tot dit elasties is.

Rol sowat 6mm uit op 'n meel bestrooide oppervlak uit.

Sny met 'n skerp mes in dun repies. Kook die snysels sowat 15-30 minute

lank in kokende melk (gebruik 250 ml melk per persoon) tot dit gaar is.

Voeg 2 stukke heel kaneel by indien verkies.

Skep in diep borde en strooi kaneelsuiker oor.

Voila!!

 

Judith Overman skryf : Ek is op soek na 'n maklike koeksister resep.

My pogings het tot nou toe altyd misluk.

Wel Judith (liewe naamgenoot!!) SO MAAK MENS :

Stroop:

7 kp water

1 Etl kremetart

3 stukke gemmer  ( as jy nie het nie sal 2 Tl fyn gemmer ook werk)

14 kp suiker!!

2 Etl stroop

Kook water, suiker en gemmer vir 3 minute,haal af en voeg kremetart en stroop by.

( Ek verkies  om ook hier sap van 1 suurlemoen  by te sit dit maak

die stroop mooi helder en gee lekker smaak.) Sit oornag in yskas.

Koeksister deeg :

3 kp meel (hoogvol)

2 tl bakpoeier

2 eiers

1  ½ kp melk en water gemeng

1 Etl margarien

knippie sout

Meng droë bestandele, en vryf botter in. Klits eiers en vloeistof.

Maak alles aan en knie vir 10 minute! Laat deeg rus vir so 3 ure in yskas.

rol nou jou deeg uit, sny jou koeksister vingertjies, vleg dit, bak dit soos

vetkoek in olie, en as dit goudbruin is dompel dit in die yskoue stroop.

Laat afdrup op druprak.

 Laat weet asseblief of dit jou kon help ek het nog ander resepte ook wat jy kan uitoets!

 NS. Het jy al Skuinskoek gemaak? (Tipiese Namakwalandse lekkerny.)

 Gebruik dieselfde stroop as hierbo, maak klein ronde vetkoekies, of rol

 die deeg in ‘n "wurm" sny stukke ewe groot met ‘n mes af

 (vandaar die  naam "Skuinskoek") en bak soos gewone vetkoek

 (Nie te groot nie hoor!!)

 Sodra dit gaar en bruin is, dompel vinnig in die stroop en laat afdrup.

 Skuinskoek moet nie so baie stroop trek soos koeksisters nie.

 Skuinskoek  kan bestrooi word met versiersuiker  na dit afgedrup het.

 Hoop dit kon help!

 

 ‘n Leseres, Marie vd Berg, het iets soets gevra

vir haar soettand-diabeet. Dalk is daar nog lesers wat hierin belang stel!

Liewe Soettand-Diabetes vriende.Ek wil begin deur te bieg en te sê

ek is glad nie ‘n dieetkundige nie,

ook dat ek myself nooit as een sal voorgee nie, maar ek leer vinnig,

graag en ek's ‘n aards-agie! 

 Saam met julle leer en vra en soek ek ook graag na oplossings!

 Die volgende kan ek  met redelike vertroue met julle deel!

(Bronne : Die suiker-sleutel, The Natural Way en my vriendin Minnie

met ‘n Diabeet tiener!)

 Wenke:

*Die suiker alleen is nie die gif nie, gebruik lae GI kosse,

meer vesels en nie te veel vet nie.

*10 gevriesde druiwe korrels is ‘n porsie. Vries die vrugte, dis amper roomys mos!!

*Dadels is jou soettand se beste vriend. Soet, dekadent, en vol vesel en goedheid!

*Eerder bietjie suiker as kunsmatige versoeter, want die diabeet se liggaam

reageer daarop amper netsoos op suiker, so albei is eintlik ewe nadelig!

(Auch!) *Amandels en  Pekanneute is beter opsie as Macadamia's.

*Wanneer jy hawermout in bv. pannekoek of gebak gebruik, vervang dit

met hawersemels, dit maak ligter gebak en die vesel inhoud is hoër.

*Ongegeurde  springmielies of gegeur met ‘n ½ pakkie vanilla gegeurde

Canderal poeier bly ‘n lekker krakerige soetheid.

 

VRUGTE EN NEUTE HAPPIES.(2 opsies)

½ kp baie fyn gekapte droë mango (of ander droë vrugte) ½ kp gekapte

 Macadamia's ( of Pekans) ½  tl fyn kaneel 1kp grondboontjie botter

 OF 1kp fyn gekapte dadels 1kp fyn gekapte droë appelkose ½ kp fyn

 gekapte Pekans ½ kp Macadamias

 Meng alles baie goed. Rol in balletjies en rol balletjies in klapper of sesamsade.

 

PANNEKOEK

 1kp volgraankoekmeelblom

 ¼ tl sout

 1 eier

 1kp +3Etl melk

 1 ½ tl  vanielje of vanilla (Ai man dis darem 2 mooi Afrikaanse  spellings!!)

 botter of olie vir bak.

 Meng meel en sout, klits eier en roer melk en vanilla in.

 Voeg by meel en meng als goed.

 As beslag te dik is, meng 1-2 Etl water by.

 Bak sowat 3Etl beslag per pannekoek in 20cm  grote pan.

Lekker vulsel : Meng :  ½ kp gewone jogurt met 1 fyn gedrukte piesang,

paar druppels suurlemoensap en  ½ tl kaneel.

 

 RYK EN ROMERIGE BRUINRYS NAGEREG

3kp vannillasojamelk (of gewone melk)

½ kp rou bruinrys

½ tl sout

 ¼ tl varsgerasperde neutmuskaat

 2 eiers liggiies geklop

 ½ kp droëkersies.

 Meng melk, rys, sout en neutmuskaat in middelgroot kastrol.

 Bring tot kookpunt oor hoë hitte. Verlaag hitte tot laag, sit deksel op

 en laat sowat 45 minute prut. Laat effe afkoel.

 Roer ½ kp  van die rysmengsel  in die eiers in, roer aanhoudend, roer dit

 nou by die res van die rysmengsel in die kastrol by. Roer kersies in.

 Plaas terug oor matige hitte en kook  tot verdik.

 Roer  kort kort dat dit nie aanbrand nie.

 Bedien warm of koud.

 Voila! Laat weet of jou soettand hiervan gehou het hoor!

 

 

18 Julie

Liewe Lesers,

Kry ek op hierdie  koue dag ‘n wonderlike epos vol smul resepte wat ek net moet deel!

Daar is min dinge so lekker soos pannekoek of plaatkoekies op ‘n koue winterdag.

  

 Sodra die eerste reënvlae ons tref of die snerpende koue almal na hul musse en serpe laat gryp,

 wil almal mos dadelik weet wanneer word die pannekoek gebak!Pannekoek,

wafels en plaatkoekies is ‘n bederf waarvoor min mense nee dankie kan sê,

 of dit nou gevul is, mildelik bedruip word met stroop en room,

 of doodeenvoudig met kaneelsuiker en suurlemoen voorgesit word.

 Pannekoeke, wafels en plaatkoekies word alles van ‘n lopende beslag gemaak

 - die verskil lê in die dikte van die beslag, hoe dit lyk en hoeveel rysmiddels dit bevat.

 Pannekoekbeslag is baie vloeibaar, ongeveer so dik soos dik room,

 en plaatkoekiebeslag is effens dikker.

 Wafelbeslag bevat rysmiddel, maar pannekoekbeslag min of niks.

ALGEMENE WENKE:

 * Die beslag moet glad wees en kan met die hand of met ‘n elektriese klitser

aangemaak word.

* Dit moet dertig minute of langer staan voor dit gebak word en moenie weer

geroer word nie.

* Die mengsels moet op ‘n warm oppervlak gebraai word en nie omgekeer

word voor dit aan die onderkant styf en gaar is nie.

* Pannekoek, wafels en plaatkoekies is die lekkerste warm en vars gebak!

Vir dun pannekoeke moet die beslag vloeibaar wees sodat dit vinnig in ‘n dun

lagie oor die boom van ‘n warm pan kan uitsprei. Beslag sonder rysmiddels is

ook gewoonlik dunner.

* Dik pannekoek se beslag is dikker. Dit bevat bakpoeier, en styf geklitste eierwitte

word ingevou, wat dit baie soos plaatkoekies se beslag maak.

* Gebruik ‘n dikboompan, laat dit goed warm word en bestryk die boom met olie

van ‘n goeie gehalte. Giet die oortollige olie af. Dit behoort nie nodig te wees

om die pan weer te smeer nie.

 * Die pan moet goed warm wees wanneer die beslag ingegooi word. Gebruik

 'n maatkoppie of sop-opskeplepel en gooi elke keer ewe veel en net genoeg

 beslag in die pan.

 * Skud die pannekoek los sodra die rand styf en effens droog lyk. Draai dit om

 met ‘n slaplemmes of eierspaan, of as jy dapper is, gooi dit om en laat dit aan

 die ander kant ligbruin word. Laat die pannekoek op ‘n warm bord uitgly.

 * Hou pannekoeke warm deur dit met velle waspapier tussenin op mekaar te

stapel op ‘n bord wat oor kookwater gesit is. As jy pannekoeke in die oond

 warm hou, word dit taai.

 * Diegene wat sagter pannekoeke verkies, kan brandewyn of suurlemoensap by

 die beslag roer.

 

PANNEKOEK:

140 g koekmeelblom (250 ml)

5 ml bakpoeier

2 ml sout

2 eiers

200 ml melk

175 ml water

5 ml suurlemoensap

125 ml sonneblomolie

1 Sif die meel, bakpoeier en sout saam.

2 Klits die eiers, melk en suurlemoensap saam.

3 Voeg die meelmengsel by en meng dit goed.

4 Voeg die olie by en meng goed om ‘n beslag, so dik soos room, te verkry.

5 Laat dit ‘n rukkie staan.

6 Smeer ‘n braaipan, liefs een met ‘n kleefwerende afwerking, baie effens met  

    sonneblomolie en verhit dit tot goed warm.

7 Roer die beslag en bak pannekoeke daarvan.

   Lewer nagenoeg 12 middelslag pannekoeke..

 

WAFELS.

4 eiergele

 ½ k melk

160 ml olie

6 el suiker (90ml)

2 tl sout

3 k gesifte meel

20 ml bakpoeier

4 styf geklopte eierwitte

 1 Meng eerste vyf bestanddele goed. Voeg droë bestanddele by.

2 Meng saam tot glad (nie te veel nie).

3 Vou eierwitte in. Bak in wafelpan.

 

 PLAATKOEKIES.

440 ml meelblom

10 ml bakpoeier

 Knippie sout

 25 ml suiker

 410g IDEAL  melk

 1 eier

 12.5 ml olie

 1 Sif droë bestanddele saam en klits eier en melk.

 2 Voeg droë bestanddele by melk en eier. Klits goed.

 3 Laat staan vir 25 minute.

 4 Skep met lepel op gesmeerde bakplaat.

 5 Keer om wanneer borreltjies bo-op bars.

 6 Plaas plaatkoekies tussen gevoude doek op ‘n draadrakkie en

 laat daarin afkoel. Sit in bak met deksel. LW: Die geheim lê in die

afkoelproses.

Smullekker plaatkoekies kan ook met vulsels gebak word.

 Skep die vulsel op die plaatkoekies sodra die beslag begin stol en voordat dit omgedraai word.

 Om die vulsel in die plaatkoekies te verseël,skep nog ‘n bietjie beslag bo-oor, laat net stol en keer om.

 PLAATKOEKIES MET SOUT VULSELS

 Groenteplaatkoekies:

 Hou gereed vir 1 x resep plaatkoekiebeslag

 ongeveer 250g geblansjeerde (tot kookpunt verhit en in koue water afgespoel) groente in repies gesny,

soos sagte jong groenboontjies, wortel, prei, aspersies en jong mielies, asook pietersielie of platblaar-pietersielietakkies of roketslaai.

Rangskik die groente sierlik op die halfgaar plaatkoekies en draai dit om

 om ook aan die anderkant te bak en die groente effens te verbruin.

Bedien met ‘n skeppie suurroom of roomkaas en grasui, of strooi ‘n bietjie gerasperde kaas bo-oor.

 

 Spek- of ham-en-kaasplaatkoekies:

 Hou gereed vir 1 x resep plaatkoekiebeslag

 ongeveer 250g gaar, grofgekapte spek of hamrepies gemeng met 200g / 500ml gerasperde Cheddarkaas.

 50ml elk varsgekapte pietersielie en gesnipperde grasui.

 Skep ongeveer 50ml van die vulsel op elke halfgaar plaatkoekie en draai om sodat dit ook aan die

 anderkant gaar word.

 

Ham-en-mielieplaatkoekies:

Hou gereed vir 1 x resep plaatkoekiebeslag

ongeveer 250g ham in fyn repies gesny, gemeng met 250ml geroomde suikermielies

50ml elk varsgekapte pietersielie en gesnipperde grasui.

Skep ongeveer 50ml van die vulsel op elke halfgaar plaatkoekie,

 en draai om sodat dit ook aan die anderkant gaar word.

 

Hoender-en-sampioenplaatkoekies:

 Hou gereed vir 1 x resep plaatkoekiebeslag

 ongeveer 250g gaar hoenderborsvleis, in fyn repies gesny, 125ml boontjiespruite en 50ml gesnipperde grasui.

 Verhit 30ml botter of margarien in ‘n vlak kastrol en roerbraai die vulselbestanddele tot net gaar en droog.

 Geur met knoffel-en-kruiegeursel, sout en swartpeper na smaak.

 Skep ongeveer 50ml van die vulsel op elke plaatkoekie en bedien die plaatkoekies met slaaigarnering

 wat vars kruie insluit.

 

 PLAATKOEKIES MET SOET VULSELS

Piesang-en-pekanneutplaatkoekies met esdoringstroop:

 Plaas ‘n paar dun skyfies piesang en ‘n strooiseltjie grofgekapte pekkaneute op die halfgaar plaatkoekie

 en draai om sodat dit ook aan die anderkant gaar word. Bedien met esdoringstroop en ‘n bakkie met

 geklitste room.

 Garneer met nog pekanneute en varsgesnyde piesang, indien verkies, en bestrooi liggies met kaneelsuiker.

 

Appel-en-kaneelsuikerplaatkoekies:

 Hou gereed vir 1 x resep plaatkoekiebeslag,

 1 x 410 g-blik tertappels, grofgekap en gemeng met 10ml gemaalde kaneel en 30ml suiker.

 Skep ongeveer 30ml van die vulsel op elke halfgaar plaatkoekie en bedien met stroop en

 'n bakkie geklitste room of roomkaas en kaneelsuiker.

 

15 Julie

 Liewe Lesers,

Ek bedink  nou die dag ook so terwyl ek vir julle skryf,

dat ons deesdae al te veel "gadgets" in ons kombuise het en gebruik,

maar ken ons ooit al die Afrikaanse name daarvoor?

En wat is werklik ononderhandelbaar?

...handversappers, verpulpers, deegsnyers, deegdrukkers en draaiers,

ontpitters en appel ontkernlepels, metaallemme, teflon kolwyntjie panne,

teflon handskoene, hand-uie-kappers, kruiekappers,

skyfielemme om maar net ‘n paar op te noem!

 Wel, laat hoor gerus van jul en vertel waarsonder jul nie kan funksioneer nie ek wil graag hoor!

 Wat maak mens tog sonder ‘n WHISK! Of moet ek vra HOE maak mens witsous daarsonder!

 En wat is ‘n kombuis sonder ‘n skêr!

Spuit joune met kleefwerende middel as jy weer malvalekkers vir ‘n tert wil snipper dit help baie,

en hou dit skerp deur soms die kante van ‘n piering te "knip"!

 My gunsteling "gadget" vir hierdie tyd van die jaar bly beslis die Lemoen uitdrukker,

 ja die gewone hand model, kompak, lig en veeldoelig en altyd binne bereik,

 en wat is lekkerder as juis ‘n vars uitgedrukte glas lemoensap?

 En wat van vars suurlemoensap vir jou tee of oor Avokado,

 of gestoomde vis of gemengde groente?

 En onthou ook dat suurlemoensap, aangesmeer aan ‘n roeskol op materiaal,

wat daarna in die son geplaas word, die roesmerke sal laat verdwyn.

 En op ‘n reënerige dag kan die kinders vermaak word deur hulle met suurlemoensap te laat verf,

 of skryf op wit papier, dit te laat droog word,

en daarna stryk hulle daaroor en siedaar! hul prent of geheime kodeskrif word onthul!

  Ai! Waar's die dae wat ons nog "bende - bende" gespeel het?

 Die dae toe ons tydskrifte  nog die "Patrys" "Tina"en "Bollie" geheet het...!!

En op die nostalgiese noot groet ek jul,Voilá 

 

13 Julie

Liewe Lesers,

Vir Augustus moet jul

ook veral onthou dat Guavas ook die wintermaande kan opkikker!

Guavas is heerlik as gestoofde nagereg of jy kan dit selfs in  potjiekos voeg vir ekstra  geur en

heilsaamheid, haal egter die pitte uit en gebruik slegs die vlees van die vrug.

 Dit is vol Vitamien C, A en B1 asook  baie yster, so vars of gaar, dit bly ‘n wenner!

 Onthou ook om die seisoen se laaste

  

Persimons en Stervrugte te geniet!

 Daar is ook steeds super-gesonde groente soos Brocholli en Blomkool beskikbaar, en sommer

 netso in die oond met bietjie olyf olie, suurlemoensap en swart peper  bly dit as bykos saam met

 'n wintersdagbraai ‘n heerlikheid wat nie te versmaai  kan word nie.

 En om jouself ‘n goeie dosis Zink te gee, veral die wat bevoorreg is om kuslangs te woon,

 Augustus is die regte tyd om ‘n hele  lekkerte van Oesters, Mossels, Allikreukels en Perlemoen te kan eet!

 Verder is daar deesdae tamaties vars in seisoen dwarsdeur die jaar, so as jul kan, plant sommer

 jul eie verskillende variëteite aan dan het jy jou eie tamaties elke dag van die jaar.

 Vir ons vensterbanke, balkonne of in kleiner sonryke spasies, kry ons die Kersietamaties

 deesdae in rooi, geel en oranje!

 Gebraaide heel Kersietamaties lyk en is altyd heerlik  met ontbyt of ‘n middagnoenmaal.

 Die klein Pruimtamatie is kleiner as die Kersietamatie, hulle is soet, ovaalvormig en ook

 perfek vir netso eet!

Albei is heerlik heel, as deel van ‘n sosatie,of  gesny in ‘n slaai. Gerooster saam met pastadisse

en saam met kaas op broodjies sal kinders vra vir meer.

Stoor dit buite op die kas i.p.v. in die yskas vir beter geur.

 

11Julie

Liewe lesers,

In die middel van die Winter is dit goed om te weet dat veral die volgende groente en vrugte

beskikbaar is in seisoen :

appels, avocado's, dadels, sitrus, papaja, pere, pynappels en beet, brocholli, kool, pampoen,

rape, en seldery;

en dat die volgende  in ons dieet ingesluit moet word want :

 *Seldery is goed om hoë bloeddruk te verlaag.(so ook heuning!)

*Avokado is goed teen gewrigspyne, karpale tonnelsindroom, algemene ongemak in die hande,

swelling en prikkeling.

 *Vars lemoensap is goed  om slaaploosheid teen te werk,  en hou die winterskwale weg en

 versterk jou immuniteit, net soos wat alle groen groentes soos:

 *Spinasie, brussels spruite, brocholli en kool ook doen, én dit is goed vir jou geheue !

*Rooi bessies soos "Cranberries" is uitstekend vir nierkwale en  blaas infeksies en onthou dat

 *Kerrie, Gemmer en Borrie natuurlike  liggaams verterkers is teen koue en kwale, arthritis en pyn!

 *Rooibostee en gemmer is ook uitstekend teen sooibrand!

 (Rooibos is  nie eintlik ‘n tee nie, maar ‘n kaffeine vrye  rooi krui van die Cederberge,

 belaai met antioxidante,teen-verouderings eienskappe, vitamiene, minerale en ook

 wonderlik teen koliek! )

 Probeer gerus die volgende:

 AVOKADO GEVUL MET GEROOKTE SNOEK:

 2 groot, ryp avokado's                                                100 g gerookte snoek, gevlok

varsgemaalde swartpeper                                            50 60 ml mayonnaise

100 g gruyère-kaas, gerasper (250 ml)                        60 ml droë broodkrummels

vinkel en suurlemoenwiggies vir garnering

Sny die avokado's in die lengte in die helfte en ontpit.  Vul die avokadohelftes met die gevlokte,

gerookte snoek.  Geur met varsgemaalde swartpeper.  Smeer mayonnaise eweredig oor elke helfte.

 Meng die kaas en broodkrummels en sprinkel oor gevulde avokadohelftes.

 Plaas avokadohelftes op 'n bakplaat en plaas onder 'n voorverhitte roosterelement vir 'n paar minute,

 totdat die kaas net smelt.  Sit voor op mooi kleinbordjies en garneer met vinkel en suurlemoenwiggies.

 Sit voor met growwe bruinbrood.

 

AVOKADOSLAAI MET SPEK EN NEUTE:

  1 pak gemengde slaaiblare                                          6 sprietuie, in ringe gesny met groen lowwe

 8 repe swoerdlose streepspek                          4 snye witbrood sonder korsies

 1 groot, ryp avokado                                                   125 ml pekanneute, grof gekap

 125 ml Franse slaaisous

Breek die slaaiblare in kleiner stukkies en plaas in die slaaibak saam met die gesnyde sprietuie.

Sny die spek in 1 cm-stukkies en roerbraai in 'n bietjie olie tot bros.  Haal uit en dreineer op

kombuis papier.  Sny die brood in blokkies (1 cm x 1 cm) en braai in die dieselfde pan as die spek

tot goudbruin.  Voeg 'n bietjie ekstra olie by indien nodig.  Haal uit en dreineer.

Sny die avokado en rangskik op die slaaiblare.  Bedek met slaaisous.  Sprinkel neute,

spek en bros broodblokkies oor slaai net voor opdiening.

 

 BUTTERNUT SOP

2 Uie - gesny

Een butternut - skoongemaak en in stukke geny

2 Hoender borsies - ontbeen en sonder vel

 750ml water

 Sout en Peper

 Kook saam tot sag en gaar.

 *OPS : Bedien saam met room en ‘n broodrolletjie.

 

 SPINASIE EN BROCHOLI SOP

 1 bos spinasie, gewas en gekerf

 1 medium broccoli, gewas en in stukkies gesny

 1 groot ui gekap

 2  knoffelhuisies  fyn gedruk

 500 ml groente ekstrak(50g se blokkies opgelos in 500ml kookwater)

 2 L melk

 200 g botter

 150 g koekmeel

 Sout en peper

 Stoom die Spinasie en Broccoli tot  net gaar,dreineer.Hou eenkant.

 Soteer  die uie en knoffel in bietjie botter, hou eenkant.

 Smelt res van botter in ‘n 5l kastrol, voeg meel by en maak ‘n pasta daarvan, kook dit

 oor stadige hitte vir nog sowat 3 minute, roer aanhoudend om aanbranding te voorkom,

 voeg die melk bietjies-bietjies by en "Whisk" om te keer dat klontjies vorm.

 Wanneer al die melk bygevoeg is, bring tot kookpunt en kook tot verdik. (soos mens witsous maak)

 Voeg nou aftreksel,uie, knoffel,spinasie en broccoli by.

 Versap dit met ‘n handversapper   "BAMIX" .

 Geur na smaak met sout en peper, en bedien stomend warm met gerasperde kaas oor,

 en ‘n growwe saadbroodjie....

 Die volgende dag is dit selfs nog lekkerder.

 

 En wat is lekkerder as om die etes mee af te sluit as ons eie inheemse

 ROOIBOSTEE  MET SITRUS !

 600 ml Warm Rooibos                                         50ml Suiker of Heuning.

 250 ml Suurlemoen of lemmetjie sap                  250 ml Lemoensap

1 suurlemoen of lemmetjie in skyfies gesny en 1 lemoen in skyfies gesny

Vars Kruisement blare en  Kersies vir garnering.

 Voeg die suiker by die Rooibos en roer tot opgelos. Voeg die vrugte skyfies by.

 Bedien warm met ‘n kruisement blaartjie by, of verkil en bedien met ys, gegarneer met

 kruisement blaartjie en ‘n kersie op ‘n tandestokkie in die glas.

(Sowat 8 glase)

 

Christene het die volgende noodkreet ingestuur :

Help asb rysmiere is besig om ons huis en tuin op te eet !Dankie.

 Sjoe Christene, jy het my omtrent laat sweet al!

Die enigste bewese raad wat ek vir jou kon opspoor is deur verskeie oorde

dieselfde ge-ego, en dit is dat jy werklik die enigste opsie moet uitvoer en

onverwyld jou naaste gif handelaar moet kontak.

Hulle kan die gebied en huis vir jou kom berook met "butielbromied" dit mag slegs deur

geakrediteerde persone en instansies gedoen word en onder streng veiligheids maatreëls

uitgevoer word,of dit kom behandel met die enigste ander werkbare alternatief, waar gate

in jou huis se fondasies geboor word, elke meter uit mekaar,en dan word daar "termicite"

(my spelling dalk ook foutief)ingeplaas,dit word dan ingeseël.

Die gif is baie giftig en veiligheids prosedures moet gevolg word.

Dit is daarom beter dat professionele persone dit vir jou doen,sodoende het jy 'n

waarborg en hulle reik die waarborge uit sodat jy jou eiendom kan verkoop as

"Termiet-vry gewaarborg" en dit is vir iets soos 5 - 10 jaar geldig.

Vir jou tuin het hul ook raad en dit is nie so drasties soos by die huise nie, maar albei

moet saam behandel word.

Ek hoop dit kon help,dit is nou beslis nie 'n DOEN DIT SELF raad nie, maar om vir jou

in hierdie geval 'n klomp boererate op te dis is om net tyd te mors met 'n ingewikkelde

en baie duur probleem.

Indien daar egter ander lesers is wat van my verskil en makliker raad het laat weet asb!

Sterkte!!

 

Ek het  intussen nog 'n baie interessante brokkie nuus ontvang vir Termiet en Rysmiere

wat 'n probleem is!

Rysmiere  vreet nie soseer die gras ens. wat hul indra nie, maar "kweek" daarop mikro

sampioentjies!! En dit eet hul dan graag! Die hele proses van organiese afbreek en

verrotting jul weet mos?

Hul teer dus eerder op die newe produk wat bietjie verder op die voedselketting

plaasvind as op die  gras of saagsels... 

Wenkem het laat weet, dat  goeie raad is, om orals waar die rysmiere in die veld

of in store waar hul maklik opspoorbaar is, 'n groot hoop kaf, strooi of saagsels wat met swamdoder

deurdrenk is te gooi. Die Rysmiere dra dit dan in hul neste in, hul vrek nie soseer daarvan nie

maar aangesien geen swamme kan groei om dit verder af te breek waarop hulle kon teer nie,

het die termiete of rysmiere sodoende nie meer kos nie en trek hul weg  na jou buurman se

veld waar daar nie swambestrydende kos is nie...!

Enige kommentaar hierop is meer as welkom

Christene het die volgende komentaar ingestuur na haar Rysmierprobleem:

Baie dankie vir die wonderlike raad. nou maak al die sampioentjies in die tuin by die

rysmier gate ook sin wat altyd n raaisel was.Bly ons kon help Christene ! Kom kuier weer!

 

Vriende, ons het belowe dat jul enigiets aan ons kan vra, en

Eddie Engelbrecht  ( email: finetuner1@absamail.co.za ) het gevra :

Ek soek 'n Dorps embleem of wapen van Bethulie daar staan onder aan die wapen

'n latynse onderskrif maar ons kan dit nie uitmaak nie het dit gekopieheer van 'n teelepel !!

kan iemand help asb ek soek net 'n afskrif of foto wat groter is Groete

 Wel  Eddie Engelbrecht ,  Kyk wat het ek vir jou !

 

 

Die naam Bethulie kom van die Franse woord   " Bethulia "   wat   " Deur God uitgekies "  beteken .

In 1829  is 'n sendingstasie deur London Missionary Society  vir die plaaslike San Boesmans

daar gestig. Dit was aanvanklik bekend as Groot Moordenaars Poort  na 'n wrede slag tussen

die Sotho  en  Griekwa  stamme .

In 1832  het  Jean Pellissier,  'n sendeling wie se tuiste vandag die oudste pioniers gebou

Noord van die Oranje rivier is, hom hier gevestig. Vandag is dit steeds as museum in Bethulie.

Tot met 1833  was  Bethulie  bekend as  Caledon ( vernoem na die nabye Caledon Rivier).

In 1833  het die Franse Sendelings vereniging die area oorgeneem en dit  Bethulia,

genoem wat soos reeds gesê   " Deur God uitgekies "  beteken .

In 1835  is dit hervernoem na  - Verheullpolis

In 1863  is die dorp gestig en weer hernoem:  Heidelberg !

In 1872  is die dorp egter weer  Bethulie  genoem n.a.v. die oorspronklike sendingstasie.

 Gedurende die  Anglo-Boere oorlog (1899  tot 1902)  is die grootste konsentrasiekamp

hier opgerig deur die Britse regering.

Onder leiding van Patrick Mynhardt het Bethulie in  Augustus 1937 'n eie dorpswapen gekry!

Die onderskrif  lui : GARDE LA FOY  ( "Vir Vryheid"  of  "Voorwaarts na Vryheid "???

Dis wat ek sou raai dit beteken! Wat dink jy?)

Hoop  dit help  Eddie ,  kom kuier gerus weer  by   :  SO MAAK MENS!

 

 




 
Wil jy hê ek moet jou meer inligting oor iets gee?    
Kontak my regstreeks by: rethajm@gmail.com  
Groetes!!
 Rx. 
 
 

Retha van Somaakmens

Indien jy nog nie ONSDORP se nuusbrief ontvang nie,

Vul die onderstaande vormpie in vir heerlike tong in die kies humor,

Vars elke twee weke in jou posbus