Groot Reiers

Hy word in sommige kulture gerespekteer en gevrees. Ek het in die verlede gesels oor ŉ hele paar voëls wat WATER as hul blyplek verkies. Sommige woon letterlik op die water (eende, bleshoenders, obbertjies), terwyl ander - die sogenaamde waadvoëls - langs of in die vlak water rondwandel
(soos strandkiewiete, elsies en reiers).
Vandag se koddige voel - die vuilbruin hamerkop (ook sy Engelse naam) met sy naamgewende kuif op die agterkop - pas by laasgenoemde. Hy is lief om al langs riviere, damme of by vleie te stap op soek na ŉ roekelose padda of vissie
wat sy skerp oë tart.
Meer as een leser het al vertel van hul dammetjie in die agterplaas met klein vissies in. Of dan - sonder vissies - nadat meneer hamerkop ŉ paar keer ŉ draai kom maak het. Vlak poele met klein tilapias of selfs jong khoivisse is vir ŉ hamerkop soos ŉ kitskos-kafee. ŉ Net oor die poel totdat die vissies te groot is vir die karnallie om te vang, is miskien ŉ goeie idee. Die hamerkop is, ondanks die ergernis wat hy vir ŉ paar mag bring, eintlik ŉ spesiale voel. Hy word gerespekteer en selfs in sommige kulture gevrees, en ŉ afbeelding van een is al tussen oeroue rotstekeninge waargeneem.
Buiten vir enkele plekke soos Madagaskar en Saoedi Arabië, kom hy net in Afrika voor en is enig in sy soort. En ja, ons het hom hier by ons ook. Hy is boonop ŉ rekordhouer in eie reg - geen voel in die wêreld bou ŉ groter nes as hy nie!
Dit kan ŉ deursnee van tot 2 meter hê, is byna net so hoog en kan tot 100kg weeg! Die geduldiges wat hom al dopgehou het, se dit kan tot 6 maande neem om ŉ rêrige grote te bou. Hy versier sy nes met allerhande rommel, ook wat hy van jou ashope en selfs (by uitsondering) jou wasgoeddraad kan steel. Dit gebeur darem nie gereeld nie, maar daar is al selfs ŉ silwer teelepel in een se nes gevind. Binne-in hierdie deurmekaar massa is ŉ tonnel en ŉ kamer waar hy sy eiers lê.
Bye en uile is bekend daarvoor dat hulle hamerkopneste oorneem, en dan moet hy maar weer voor begin. Hulle word tot 20 jaar oud, dus is daar darem genoeg tyd vir die bou van ŉ volgende rekordgrootte nes.
Hamerkoppe is redelik individualisties. Jy sien hulle selde in groepe saam, maar kom jy een (of sy nes) tee, kan jy gerus tyd afknyp om hom dop te hou.